Йәштәр уҡыу йортоноң тышҡы йөҙөн матурлай

Өфө дәүләт нефть техник университетында белем алған буласаҡ архитекторҙар һәм төҙөүселәр бер нисә монументаль һынлы сәнғәт (мурал) концепцияһын әҙерләгән. Киләсәктә ул Черниковка биҫтәһендә урынлашҡан өсөнсө уҡыу корпусының стенаһын биҙәйәсәк. Өфө дәүләт нефть техник университетының матбуғат хеҙмәте белдереүенсә, йәштәр эшләгән стрит-арт объекттар студент тормошо, университет, архитектура һәм экология темалары менән бәйле. Улар – барлығы дүртәү. Бынан тыш, йәштәр шул уҡ стилдәге брендлы продукция өсөн идеялар тәҡдим итте. Эш «Өҫтөнлөк-2030» үҫеш программаһының «Яңы йәшәү мөхите» стратегик проекты сиктәрендә, «Фән һәм университеттар» милли проекты (национальный проект «Наука и университеты») маҡсаттарына ярашлы алып барыла. Студент ҡаласығында элек тә төрлө майҙандарға тәғәйен һүрәттәр төшөрөлдө. Әйтәйек, 2021 йылда биналар араһындағы ҡоймала Советтар Союзы Геройы, нефть институтының хеҙмәтте һаҡлау бүлеге мөдире Матвей Савельевич Пинскийҙың портреты барлыҡҡа килде. – Стрит-арт ҡала образын архитектура, художество һәм тарихи аспекттарҙа һынландырырға мөмкинлек бирә, – тип билдәләне проект етәксеһе, архитектура фәндәре кандидаты Юлиә Рәсүлева. – Студенттарыбыҙ мурал өсөн һайлаған урын төрлө яҡтан һәйбәт күренә һәм ҡала киңлегендә бик шәп навигация үҙәге булыуы мөмкин. Стрит-арттан тыш, студенттар бәләкәй архитектура формаларын проектлай, йәмәғәт киңлектәре сценарийҙарын әҙерләй. Быларҙың барыһы ла кампус биләмәһен үҙгәртеү өсөн яңы идеялар тыуҙырырға мөмкинлек бирә, шулай уҡ студенттарҙы һәм уҡытыусыларҙы берлектәге проект эшмәкәрлегенә йәлеп итә. Рәсәй Президенты В.В. Путиндың май указдары тарафынан раҫланған милли проекттар тотош ил күләмендә уңышлы тормошҡа ашырыла һәм яңы мөмкинлектәргә, үҫешкә юл аса. Фото: ӨДНТУ сайтынан.