“Медиала финанс мәҙәниәт” темаһы буйынса семинар булды

Евразия фәнни-белем биреү үҙәгенең Өфө вуз-ара студенттар кампусында Башҡортостандың киң мәғлүмәт саралары вәкилдәре өсөн “Медиала финанс мәҙәниәт” темаһы буйынса семинар булды. Уны Финанс министрлығы ойошторҙо. Семинарға билдәле журналист, “Ғаилә финансы – ябай ғына” китабы авторы Инна Филатова спикер итеп саҡырылғайны. Сараны БР финанс министры вазифаһын башҡарыусы Светлана Малинская асып, финанс белем һәм республика халҡында финансҡа айыҡ ҡараш формалаштырыу ведомство эшмәкәрлегенең өҫтөнлөклө йүнәлештәренең береһе булыуын һыҙыҡ өҫтөнә алды. Министр вазифаһын башҡарыусы билдәләүенсә, был өлкәлә халыҡҡа мәғлүмәт еткереүҙә киң мәғлүмәт саралары мөһим урын биләй. IT-технологиялар ҡулланып мутлашыу мәсьәләһенә семинарҙың айырым өлөшө бағышланды. Башҡортостан Башлығының матбуғат секретары-матбуғат хеҙмәте һәм мәғлүмәт идаралығы начальнигы Диана Сәфәрғәлиева һөйләүенсә, 2024 йылдың һигеҙ айы йомғаҡтары буйынса республикала мәғлүмәт-телекоммуникация технологияларын файҙаланып 9 меңдән ашыу урлашыу осрағы теркәлгән. 2024 йылдың 8 сентябренә ҡарата IT-енәйәттәрҙе файҙаланып урлауҙың дөйөм зыяны 2,6 миллиард һумдан ашыу тәшкил итә – был республикала ғына. IT-технологиялар ярҙамында енәйәттәрҙән төрлө категория граждандары зыян күрә, күпселек осраҡта килеме түбән булған кешеләр, бюджет өлкәһе хеҙмәткәрҙәре, пенсионерҙар, финанс белеме, шул иҫәптән дистанцион банк хеҙмәтләндереүе өлкәһендә түбән белемле граждандар. Шулай уҡ ул мәғлүмәт технологияларын ҡулланып мутлашыусыларҙың законһыҙ ғәмәлдәрен яҡтыртыу йәһәтенән төбәктә уҙғарылған саралар тураһында һөйләне һәм республика халҡын йәлеп иткән енәйәт схемаларының төп төрҙәрен билдәләне. Башҡортостан Республикаһы Башлығының Социаль коммуникациялар буйынса идаралығы начальнигы вазифаһын башҡарыусы Дмитрий Черенков республиканың финанс проблемалары һәм мутлашыуға ҡаршы көрәш мәсьәләләрен яҡтыртыу буйынса идара итеү үҙәгенең мәғлүмәт ресурстары мөмкинлектәре тураһында һөйләне. Инна Филатова финанс темаларын яҡтыртыуға заманса алымдар менән уртаҡлашты, уңышлы федераль миҫалдар килтерҙе, яҡшы тәжрибәләр хаҡында һөйләне, шулай уҡ киң аудитория өсөн аңлайышлыраҡ материалдар булдырырға мөмкинлек биргән алымдар тәҡдим итте. Башҡортостан Республикаһының матбуғат һәм киң мәғлүмәт саралары агентлығы етәксеһенең беренсе урынбаҫары Елена Арямнова сараның киң мәғлүмәт саралары вәкилдәре өсөн файҙалы булыуын билдәләне һәм журналистарҙың мутлашыусыларға ҡаршы тороу һәм халыҡтың финанс мәҙәниәтен күтәреү буйынса эшкә ҙур өлөш индереүен һыҙыҡ өҫтөнә алды. Башҡортостан Республикаһы финанс министры вазифаһын башҡарыусы Светлана Малинская йыйылыусыларға рәхмәт белдерҙе һәм финанс проблемаларын яҡтыртыусы журналистарҙы бүләкләне. Мәғлүмәт сығанағы һәм фото: https://pravitelstvorb.ru/news/25076/