"Өфө-арена" боҙ һарайы майҙансығында Башҡортостандан мобилизацияланған һалдаттарҙы, хеҙмәт-хәрби бурыстарын үтәү урынына, оҙатыу булды. Унда рәсми кешеләр, һалдаттарҙың яҡындары һәм туғандары ҡатнашты. Башта Рәсәй һәм Башҡортостан гимндары яңғыраны. Илебеҙҙең һәм республикабыҙҙың флагтары күреү, хәрби көйҙө тыңлау ғорурлыҡ тойғоһо уята. Республикабыҙҙың хәрби комиссариатының мобилизацияланғандарҙы планға индереү, әҙерлеккә ҡуйыу һәм иҫәп алыу бүлеге начальнигы, подполковник Александр Кушаков, яҡташтарыбыҙҙы Башҡортостан Башлығы Радий Хәбировтың исеменән ҡотлап, былай тине: – Һеҙҙең менән ғаиләләрегеҙ, туғандарығыҙ, бөтә республикабыҙ һәм тотош илебеҙ ғорурлана. Ҡыҫҡа ваҡытлы ялдарығыҙҙы файҙалы һәм матур итеп уҙғарғанығыҙға тулыһынса ышанам. Һәм ҡатмарлы хәрби бурысты үтәргә юлланаһығыҙ. Һәммәгеҙ ҙә Ватаныбыҙҙы ҡыйыу һаҡлайһығыҙ, барығыҙ ҙа ҡаһарманлыҡ һәм илһөйәрлек тәңгәлендә беҙгә өлгө булып тораһығыҙ. Александр Николаевич билдәләүенсә, яҡташтарыбыҙ хәрби бурысын үтәгәндә уларҙың һәр береһенең ғаиләһе, яҡындары һәм туғандары тураһында хәстәрлек күрелә, социаль һәм көнкүреш мәсьәләләр оператив хәл ителә. Республикабыҙ махсус хәрби операция биләмәһенә гуманитар ярҙамды даими оҙата. Ошо юғарыла һаналған тәүге эштәр һәр ваҡыт бөтә тулылығында тормошҡа ашырыласаҡ. – Һеҙ дан менән ҡайтасаҡһығыҙ, герой яҡташтарыбыҙҙы ҡаршы алырға һәр саҡ әҙербеҙ, беҙ дөрөҫ юлдан барабыҙ, Еңеү беҙҙең яҡта буласаҡ, – тип тамамланы сығышын подполковник Кушаков. Өфө ҡала советы хакимиәте башлығы урынбаҫары Фәнүр Ҡәйүмов барыһына ла уңыштар һәм тыуған яҡтарына иҫән-һау әйләнеп ҡайтыуҙарын теләне. "Пушка" позывнойлы һалдат белдереүенсә, егет исемен күтәреп йөрөүсе һәр көслө зат һәм ирмен тигән ир йәмғиәтебеҙгә ҡурҡыныс янау менән, ике уйламайынса, ил сигенә баҫырға бурыслы. Ул да һөйөклө кәләше, ғәзиз балалары, ғөмүмән, рәсәйҙәр, шул иҫәптән башҡортостандар тыныс йоҡлаһын, күгебеҙ һәр саҡ аяҙ булһын өсөн ҡулына ҡорал алған. Ауылда йәшәгән, Себер тарафтарына йөрөп эшләгән, ни тиһәң дә, биш балаһы кеше араһында кәм-хур булып күренмәҫкә, киреһенсә матур итеп кейенеп йөрөргә тейеш. Альбина ханым ике туғанын махсус хәрби операция биләмәһенә оҙата. "Арыҫлан"дың кәйефе күтәренке булыуына шатлана, уның Еңеү менән ҡайтырына тулыһынса ышана. Фото: Илдар Аҡъюлов.