Бөгөн С.Т. Аксаков исемендәге мәҙәниәт һәм ял баҡсаһында бик күңелле булды. Әллә ҡайҙан патриотик йырҙар яңғыраны, флагтар тотҡан йәштәр осраны. Бында Донецк һәм Луганск халыҡ республикаларының, Запорожье һәм Херсон өлкәләренең Рәсәй Федерацияһына ҡушылыу көнөнә арналған концерт үтте. 2022 йылдың 30 сентябрендә ошо төбәктәрҙе Рәсәй составына индереү тураһында килешеүгә ҡул ҡуйылды. Донецкиҙа, Луганскиҙа, Запорожьела һәм Херсонда йәшәүселәр, үҙҙәренең ҙур илебеҙҙең бер өлөшө булырға теләүен раҫлап, һайлау яһаны. 30 сентябрь - Рәсәй тарихында халҡыбыҙҙың берҙәмлеген һәм көсөн, Тыуған илен яҡларға һәм киләсәкте бергәләп төҙөргә әҙер булыуын символлаштырған иҫтәлекле дата. Концерт ҡала Мәҙәниәт һарайы солистары башҡарыуында “Артефакттар” йырынан башланды. Сәхнәлә бик күп патриотик йырҙар яңғыраны, улар араһында “Кешеләр ишетһен”, “Минең Рәсәйем”, “Тыуған ер” һәм “Тыуған ил” йырҙары бар. Сәхнәнән Малороссияның Рәсәй менән айырылғыһыҙ бәйләнеше һәм ауыр йылдарҙа үҙ ерен һаҡлаған рус халҡының батырлыҡтары тураһында телгә алынды. Айырыуса Луганскиҙа тыуып үҫкән Михаил Матусовскийҙың шиғырына яҙылған “Тыуған ил ҡайҙан башлана” йыры иғтибарҙы йәлеп итте. Уға көйҙө композитор Вениамин Баснер яҙған. Композицияны халыҡ-ара һәм бөтә Рәсәй конкурстары лауреаты Марина Васильева башҡарҙы. Патриотик программа “Шайморатов – генерал”, “Беҙ берҙәм”, “333” һәм “Беҙ миллион рус” йырҙарын башҡарыу менән дауам итте. Концерт ҡала мәҙәниәт һарайы солистары ҡатнашлығында “Алға, Рәсәй!” йыры менән тамамланды. Фото: Динар Кәлимуллин.