“Ҡурай крайы”, “Салауат ҡылысы” һәм башҡа ярыштар була

Башҡортостан Хөкүмәте Премьер-министры вазифаһын башҡарыусы Андрей Назаров XII “Рәсәй – спорт иле” халыҡ-ара форумына әҙерлек һәм үткәреү буйынса ойоштороу комитетының һуңғы кәңәшмәһендә сығыш яһаны. Ул Рәсәй Хөкүмәте Рәйесе урынбаҫары Дмитрий Чернышенкоға Башҡортостандың быйыл 17 – 19 октябрҙә Өфөлә үткәреләсәк форумға әҙерлеге тураһында хәбәр итте. “Рәсәй – спорт иле” форумына әҙерлек планға ярашлы һәм бер нисә йүнәлештә бара, тине ул. Көрәш һарайы төп майҙанға әүереләсәк. Ул быйыл августа сафҡа ингәйне. Объект донъя кимәлендә һәм форум талаптарына яуап бирә. Бынан тыш, ҙур объекттарҙың – Фехтование үҙәгенең, Ишкәкле слалом комплексының һәм “Амфибия” спорт үҙәгенең асылыуы көтөлә. - Ишкәкле слаломда беренсе тапҡыр “Ҡурай крайы” тип исемләнгән халыҡ-ара ярыштар үткәреләсәк. Фехтование үҙәгендә йәш үҫмерҙәр араһында “Салауат ҡылысы” тип исемләнгән халыҡ-ара турнир була. 17 октябрҙә “Өфө-Арена”ла “IBA чемпиондары төнө” һөнәри бокс кисе ойошторола. Континент чемпионы титулына донъяның иң яҡшы боксерҙары алышасаҡ. Бәләкәй аренала йәш үҫмерҙәр араһында керлинг буйынса Бөтә Рәсәй ярыштары үтәсәк. “Динамо” спорт комплексында “Динамо” һәм ”ЦСП-Химки” клубтары араһында Рәсәй чемпионатын ҡарарға мөмкин буласаҡ. Спорт әҙерлеге үҙәгендә Рәсәйҙең Паралимпия комитетының МХО ветерандары өсөн саралары үткәреләсәк. Бөтә Рәсәй атлау көнөндә 25 мең тирәһе кеше ҡатнашырға теләй, - тип һөйләне форум программаһы тураһында Андрей Назаров. Форум майҙансыҡтарында стационар медицина постары ҡуйыласаҡ һәм ашығыс медицина ярҙамы бригадалары дежур итәсәк. Медицина катастрофалары үҙәге, Республика табип-физкультура диспансеры, 14 дауахана һәм поликлиника йәлеп ителгән. Пленар кәңәшмәлә ҡатнашыусыларҙың барыһы ла ковидҡа тест үтәсәк. Хоҡуҡ тәртибен тәьмин итеү өсөн ведомство-ара төбәк эшлекле төркөмө эшләйәсәк, көс структуралары менән үҙ-ара эшләү тураһында килешелгән. - “Рәсәй – спорт иле” халыҡ-ара форумы, ҡарарҙарҙы берҙәм эшләү өсөн майҙансыҡҡа әйләнеп, ағымдағы геосәйәси шарттарҙа айырыуса мәғәнәгә эйә. Халыҡ-ара эксперттар берҙәмлеге менән спорт берекмәләрен ойоштороу һәм ярыштарҙың яңы форматтары тураһында һөйләшәсәкбеҙ. Шулай уҡ Хөкүмәт менән спорт берҙәмлеге менән берлектә ватан спорты үҫешенең дәүләт программаһы төҙөлә, уны тормошҡа ашырыу мәсьәләләре тураһында ла форум майҙансығында һөйләшәсәкбеҙ. Президент Владимир Путин тарафынан маҡсаттар билдәләнгән: күберәк граждандарҙы спорт менән даими шөғөлләнеүгә йәлеп итеү һәм спортсыларыбыҙҙың ярышыу әүҙемлеген күтәреү, - тине Рәсәй Хөкүмәте вице-премьеры Дмитрий Чернышенко. - Ойоштороу комитеты форум девизын раҫланы: “Спорт. Ғаилә. Рәсәй”. Ул “Форумдың халыҡ-ара девизы” асыҡ йәмәғәт акцияһы һөҙөмтәләре буйынса һайланған. Шулай уҡ эшлекле, спорт һәм мәҙәни программаларҙы, 40-тан ашыу сараны ҡараныҡ. Улар һигеҙ майҙансыҡта үтәсәк. Көрәш һарайы иң мөһиме буласаҡ, - тип өҫтәне Рәсәйҙең спорт министры Михаил Дегтяров. Форумдың маҡсаты – стратегик планлаштырыуҙың спорт тармағында проектланған комплекслы сараларын эшләү. Улар 2030 йылға тиклем һәм 2036 йылға тиклем перспективаға Рәсәй Федерацияһы үҫеше милли маҡсаттарына өлгәшеүгә йүнәлтелгән. РФ Президенты Указына ярашлы, граждандарҙың физкультура һәм спорт менән шөғөлләнеү өсөн шарттар менән ҡәнәғәтлелек кимәлен күтәреү. Сығанаҡ, фото: pravitelstvorb.ru/news/25075/