Таксиҙа эшләгән водителде төп башына ултыртҡандар!

Үткән тәүлектә республика халҡы уғрыларға 12 миллион һумға яҡын аҡса күсергән. Мутлашыусыларҙың тоҙағына Татарстандан 41 йәшлек ир эләккән. Ул таксиҙа шәхси ташыу менән шөғөлләнә. 23 сентябрь иртән зыян күреүсегә махсус ҡушымтала Яр Саллы ҡалаһынан Өфөгә тиклем пассажир алып барыу өсөн заказ килә. Ир пассажирҙы ҡаршы ала. Шул ваҡыт енәйәтсе Башҡортостанға барғас, уға кире Татарстанға ҡайтырға кәрәклеген белдерә һәм ҡушымталағы заказдан баш тартырға тәҡдим итеп, аҡсаны икенсе юл менән түләргә күндерә. Водитель ризалаша һәм шул ваҡыт уғры мутлашыу схемаһына күсә. Тәүҙә ул картаһынан аҡса сығарғанда һалым түләүҙән ҡасыр өсөн, иҫәбендә билдәле бер сумманың булырға тейешлеген һөйләй. Бының өсөн ул водителдән 30 мең һум аҡса күсереүҙе һорай, шулай уҡ сумманы күберәк ҡайтарырмын тип вәғәҙәләргә лә онотмай. Водитель аҡсаны күсергәс, енәйәтсе таксисҡа кире 500 мең һум күсереүе тураһында яһалма скринды күрһәтә. Мутлашыусы бының менән ғына туҡтап ҡалмай. Ул водителгә интернет-биржаһындағы иҫәбен күрһәтә һәм ошо рәүешле аҡса эшләргә тәҡдим итә. Водитель уғрыға үҙенең телефонын бирә, ә ул иһә кредит картаһын рәсмиләштерә һәм 500 мең һумдан ашыу аҡсаны махсус иҫәпкә күсерә. Өфөгә килгәс, ирҙәр күсерелгән аҡсалар урынына ҡулаҡса бирергә тейешле кешеләр менән осрашырға тейеш була. Тик пассажирға берәү шылтырата һәм бер үҙенә генә килергә ҡуша. Енәйәтсе һәм зыян күреүсе сауҙа үҙәгенә бергәләп инәләр, әммә күп тә үтмәй мутлашыусы юҡҡа сыға. Һөҙөмтәлә водитель 530 мең һумдан ашыу аҡсаһын юғалта. Өфө полицияһы хеҙмәткәрҙәре пенсионерҙың аҡсаһын һаҡлап ҡалған. Баш ҡалала сауҙа үҙәктәренең береһендә полиция хеҙмәткәрҙәренең иғтибарын оло ғына ир йәлеп итә. Пенсионер телефондан һөйләшеп, банкомат аша ҙур ғына сумма аҡса күсерергә ниәтләп йөрөгән була. Ир менән һөйләшкәндә полиция хеҙмәткәрҙәре уның мутлашыусыларҙың ҡорбаны булыуын аңлай һәм пенсионерҙы аҡсаһын күсермәҫкә күндерә. Баҡтиһәң, зыян күреүсегә билдәһеҙ кеше шылтыратып, үҙен Хеҙмәт һәм социаль яҡлау министрлығы хеҙмәткәре тип таныштыра. Ул хеҙмәт стажын арттырыу өсөн пенсияны ҡайтанан иҫәпләргә кәрәклеген хәбәр итә. Пенсионерҙың ышанысына инеп, мутлашыусылар уны төрлө банк ойошмаларына аҡса туплау өсөн ебәрә. Шулай итеп, полиция менән осрашыуға тиклем, ғариза биреүсе мутлашыусыларға бер миллион 300 мең һум аҡса күсереп өлгөргән була. Әлегә осраҡ буйынса енәйәт эше ҡуҙатылған. БР Эске эштәр министрлығы иҫкәртә: иғтибарлы һәм һаҡ булығыҙ! Билдәһеҙ кешеләрҙең финанс һорауҙары буйынса тәҡдимдәренә ризалашмағыҙ, башҡаларға банк системаһына инеүҙе ышанып тапшырмағыҙ. Ҡыҫҡа ваҡыт эсендә күп аҡса эшләү тәҡдимдәре һеҙҙең менән мутлашыусылар бәйләнешкә инеү хәүефен арттыра. Банк иҫәбенә зыян килтергән ошондай ғәмәлдәрҙән ҡасығыҙ. Фото: БР буйынса МВД.