5 октябрь – Уҡытыусылар көнө айҡанлы ойошторған конкурсыбыҙҙа ҡатнашыусылар менән таныштырыуҙы дауам итәбеҙ. Стәрлетамаҡ ҡалаһы мәғариф бүлегенең мәғлүмәт-методик үҙәге методисы Зөбәржәт Хафизова тураһында һүҙебеҙ. Зөбәржәт Ришат ҡыҙы Ишембай районының Үрге Әрмет ауылында тыуып үҫкән, 11-се класты тамамлағас, Стәрлетамаҡ дәүләт педагогия институтына уҡырға инә. 1998 йылда, уҡып бөткәс, Стәрлетамаҡ ҡалаһында эшкә ҡала. – Уҡытыусы һөнәренә килеүем тыуғандан уҡ билдәләнгән булған. Атайым һәм әсәйем башланғыс класта уларҙы уҡытҡан уҡытыусыны шул тиклем яратҡан, хатта иң беренсе бала булып ғаиләлә мин тыуғас, уның хөрмәтенә Зөбәржәт тип исем ҡушҡандар. Атайым мәрхүм булғансы Зөбәржәт апайҙы онотманы, һуғым мәлендә – ит, көҙөн картуф, сөгөлдөр, кишер, һуған кеүек күстәнәстәр илтер ине. Шул хөрмәт, моғайын, миңә ҡан аша бирелгәндер, – ти Зөбәржәт Ришат ҡыҙы уҡытыусы һөнәрен һайлауы тураһында. Әлбиттә, был һайлауға уҡытыусылары ла ҙур йоғонто яһай. – Түбәнге Әрмет мәктәбендә уҡығанда башҡорт теле һәм әҙәбиәте уҡытыусыһы Наилә апай шул тиклем үҙ һөнәренең оҫтаһы булды. Уға һоҡланып, уның юлын һайланым. Ғөмүмән, уҡытыусыларыбыҙ ныҡ матур, аҡыллы ине, барыһы ла эшенә мөкиббән бирелгән кешеләр булды, әлегәсә һәр береһенә рәхмәтлемен. Беҙҙең кластан ғына ете кешенең уҡытыусы һөнәрен һайлауы үҙе үк күп нәмә тураһында һөйләй бит, – тип остаздарын оло хәрмәт менән иҫкә ала Зөбәржәт Хафизова. Зөбәржәт Ришат ҡыҙы үҙ хеҙмәте менән башҡаларҙың тормошон яҡшы үҙгәртеү, кемделер насар юлдан айырып алыу, кәңәш биреү, ярҙам итә алыу мөмкинлегенә айырыуса ҙур әһәмиәт бирә. “Уҡытыусы бала менән генә эшләмәй бит, ата-әсә менән дә, коллегалары менән дә хеҙмәттәшлек итә”, – ти ул. Ул оҙаҡ йылдар Стәрлетамаҡ ҡалаһының 30-сы мәктәбендә башҡорт телен уҡыта. Унан Жәлил Кейекбаев исемендәге 3-сө гимназияла директор урынбаҫары булып эшләй. 2013 йылда Башҡортостан Мәғарифты үҫтереү институтының көньяҡ зонаһы буйынса етәксе итеп тәғәйенләнә. Ҡаланың 30-сы мәктәбендә эшләгәндә үк ҡала уҡытыусылары тарафынан методист итеп һайлана һәм әлегәсә ошо йөкләмәне намыҫлы башҡарып килә. Алдынғы ҡарашлы, һәр саҡ ҙур маҡсаттарға ынтылып эшләгән тырыш педагогтың хеҙмәте бик күп грамоталары менән билдәләнгән. Зөбәржәт Ришат ҡыҙы тормош юлдашы Камил менән ике бала тәрбиәләп үҫтергәндәр. Улдары Алмаз Сорғот ҡалаһында нефть һәм газ өлкәһендә әйҙәүсе инженер булып эшләй. Килендәре Алина институтта уҡый, психолог һөнәренә эйә буласаҡ. Ҡыҙҙары Камилла Ҡазан ҡалаһындағы Волга буйы дәүләт университетында спорт, туризм һәм физик культура буйынса белем ала. “Уҡытыусы – ниндәй гүзәл исем!” конкурсында ҡатнашҡан Зөбәржәт Ришат ҡыҙы Хафизова өсөн әүҙем тауыш бирергә саҡырабыҙ: https://vk.com/app7198399_-104965500#poll66eab9968f5a0f0c14f42374 “Башҡортостан” гәзите төркөмөнә (https://vk.com/gazetabashkortostan) һәм Телеграмдағы каналыбыҙға (https://t.me/bash_news102) яҙылығыҙ!