Сибай дәүләт филармонияһы барлыҡҡа килеү мәленән алып үҙенең йәш йырсылары менән дан ҡаҙанды. Азамат Тимеров, Лилиә Ишемйәрова, Раян Алтыншин, Альберт Салауатов һәм башҡалар, йәшләй генә тап бында сәхнәгә сығып, оло ижад донъяһына тәүге аҙымдарын яһаны. Хәҙер уларға алмашҡа килгән йырсылар ҙа ҙур исемдәр яуланы, үҙ тамашасыһын тапты.
Алина ВӘХИТОВА — бөгөнгө көндә Сибай концерт-театр берекмәһенең иң йәш солисы. Һәр сығышына ентекле әҙерләнгән, ижадына талапсан ҡараған йырсыға остаздары ҙур өмөттәр бағлай.
– Алина, йырсы булыу бала саҡ хыялың инеме? Тәүге тапҡыр сәхнәгә сыҡҡаныңды хәтерләйһеңме?
– Эйе, бәләкәй сағымда уҡ, йырсы булам, ҙур сәхнәгә сығам, тигән хыялдар менән йәшәй торғайным. Шулай ҙа 9-сы класты тамамлағанда бер аҙ икеләндем: табип һөнәре лә оҡшай башланы, йырлағы ла килә. Күңелемдең баребер сәхнәгә ынтылышы көслөрәк булды – Стәрлетамаҡ мәҙәниәт колледжының йыр бүлегенә уҡырға индем. Аҙаҡ инде Өфө дәүләт сәнғәт институтын да тамамланым.
Беренсе тапҡыр сәхнәгә сыҡҡанда биш йәш ине. Ауыл мәктәбенең Яңы йыл кисәһе ине ул, Гөлдәр Ишҡыуатованың “Ҡара бесәй балаһы” йырын башҡарҙым. Тиҙ арала, кистән генә әҙерләнгән йыр ине ул, шулай ҙа тамашасылар йылы ҡабул итте.
Шул көндән һуң клуб мөдире Ильмира Сәмирхан ҡыҙы мине төрлө байрам кисәләренә, концерттарға саҡыра башланы. Сәхнәгә сығыу бер байрам кеүек була торғайны. “Яҙғы тамсылар”, “Юрматы йондоҙсоҡтары”, “Сулпылар” кеүек төрлө конкурстарҙа ҡатнаша башланым, призлы урындар яуланым. Етенсе класҡа Стәрлетамаҡ ҡалаһының Ленин исемендәге 2-се лицей-интернатына уҡырға барҙым. Унда ла сәхнәнән ситләшмәнем.
– Үҙең ҡайһы яҡта тыуып үҫтең? Нәҫелегеҙҙә сәнғәт кешеләре бармы?
– Ишембай районының иң матур ауылдарының береһе – Ғүмәрҙә, ябай ғаиләлә тыуып үҫтем. Ғаиләлә беҙ өс бала, апайым Башҡорт дәүләт медицина университетының педиатрия факультетын тамамлап, Стәрлетамаҡ ҡалаһында эшләп йөрөй. Ҡустым – 8-се класс уҡыусыһы. Нәҫелебеҙҙә сәнғәт кешеләре булмаһа ла, йырсылар ҙа, гармунсылар ҙа етәрлек. Атайым гармунда уйнай, әсәйем яғынан олатайым оҙон көйҙәрҙе бик матур башҡара.
– Күңелеңә ниндәй йырҙар яҡын, кемдәрҙең ижадын яратаһың?
– Халыҡ йырҙарын яратам. Сөләймән Абдуллин, Ғәли Хәмзин башҡарыуындағы оҙон көйҙәрҙе тыңлап, улар кеүек урынына еткереп, йырларға тырышам. Мөмкинлек булыу менән халыҡ ижадын өйрәнәм. Шулай уҡ эстрада йырҙарын да яратып башҡарам.
– Йырҙан тыш тағы ниндәйҙер ҡыҙыҡһыныуҙарың бармы?
– Бешеренергә, аш-һыу әҙерләргә яратам, ауылға ҡайтҡан саҡта баҡса эштәрен башҡарам. Шулай уҡ мода һәм психология менән ҡыҙыҡһынам.
– Күп артистар шәхси тормошонан “хайп” яһап, тиҙ генә популярлыҡ яулай. Һин был йәһәттән үтә лә тыйнаҡһың...
– Интернетта йышыраҡ күренеп тороу, социаль селтәрҙәге шәхси битеңә күберәк постар һалыу йырсы өсөн тик файҙаға ғына. Мин үҙем дә булған ваҡиғаларҙы һалырға тырышам. Тик ҡайһы ваҡытта онотоп китәм йә теләк булмай. Миңә был йәһәттән башҡаларҙан өлгө алырға, өйрәнергә кәрәк. Әммә “хайп”тың да төрлөһө булғанын оноторға ярамай. Яһалмалылыҡ менән булышҡым килмәй, ә ысынбарлыҡтағы тормошом менән бүлешергә ризамын һәм даими рәүештә фотолар, яҙмалар ҡуям, йырҙарым менән бүлешәм.
– Сәхнәгә сыҡҡанда ниндәй хис-тойғолар кисерәһең?
– Тамашасыма йырым аша бар күңелемде асып, мөхәббәт тойғолары менән сығам. Тулҡынланыу ҙа кисерәм, әммә быны һиҙҙермәҫкә тырышам. Бейеүселәр нимә әйтерен хәрәкәт менән аңлатһа, йырсы хистәрҙе йыры менән еткерә. Бөтә күңелеңде бирмәйһең икән, ул халыҡҡа барып етмәйҙер, тип уйлайым.
– Ә һинең өсөн йыр нимә ул? Ошо юлдан киткәнеңә үкенмәйһеңме?
– Тәүге осорҙа, үкенеү тип әйтмәйем, икеләнеү кеүек тойғолар булғыланы. Сөнки бала саҡ хыялы – ул хыял, ә йырсы булып эшләй башлағас, ысынбарлыҡ менән осрашаһың, төрлө ауырлыҡтар ҙа була. Башлап ҡына сәхнәгә аяҡ баҫҡан йәш йырсыларға тәүге осорҙа еңел түгел. Тик мин яҡшы беләм: ауырлыҡтарҙы хеҙмәт һәм ныҡышмаллыҡ менән генә еңеп була. Хәҙер инде аҙмы-күпме тәжрибә бар, һәр һынау артында уңыш көткәнен аңлайым. Күңелем тынысһыҙланғанда, ауырлыҡтар алдында баҙап ҡалғанда тағы ла бер дауам бар – илһам, көс-дәрт алырға тыуған ауылыма ҡайтам. Ул бик матур тәбиғәт ҡосағында урынлашҡан: тирә-яғын тауҙар уратып алған, эргәһенән генә Егән йылғаһы аға. Ғүмәремә ҡайтып, тәбиғәткә сыҡһам, тауҙарымды байҡаһам, миңә ниндәйҙер көс, илһам килә.
Ә йыр – минең эшем, һөнәрем генә түгел, йән дуҫым да. Ул мине бала саҡтан оҙатып килә. Отпуск ваҡытында оҙаҡ ҡына сәхнәгә сыҡмай торһам, йәнемә нимәлер етмәгән кеүек була. Ә былай мин һәр ваҡыт көйләп йөрөйөм, эш менән булғанда, өйҙә яңғыҙ ҡалғанда ла йырлап алам.
– Әңгәмә өсөн ҙур рәхмәт, Алина. Һинең үҙеңә һаулыҡ, ҡатын-ҡыҙ бәхете, ижадыңа оҙон ғүмер, уңыштар теләп ҡалабыҙ. Йыр сәнғәтенә тоғро ҡалып, сәхнә балҡытып йәшәргә яҙһын!
Гөлнур ҠЫУАТОВА әңгәмәләште.
