Виртуаль концерт залдары асылды

Яңы мәҙәни мөхиттәрҙең барлыҡҡа килеүе “Мәҙәниәт” милли проектының “Һанлы мәҙәниәт” төбәк проектын тормошҡа ашырыу сиктәрендә барлыҡҡа килгән. Мәләүез ҡалаһының үҙәк китапханаһында виртуаль концерт залын асыу тантанаһында Мәләүез районы хакимиәтенең мәҙәниәт бүлеге етәксеһе Ләйсән Йәмилева тамашасыларға ҡотлау һүҙҙәре менән мөрәжәғәт итте: –Виртуаль концерт залы – ҡала халҡы өсөн ҙур бүләк. Хәҙер реаль ваҡыт режимында беҙ симфоник оркестрҙарҙың концерттарын, илебеҙҙең алдынғы мәҙәни учреждениеларының операларын, мюзиклдарын һәм әҙәби-музыкаль постановкаларын ҡарай һәм тыңлай аласаҡбыҙ. Сарала Мәләүез ҡалаһы 1-се һанлы балалар сәнғәт мәктәбенең скрипка һәм виолончель класы уҡыусылары сығышы музыкаль бүләк булды. Артабан тамашасылар, дөйөм белем биреү һәм урта махсус учреждениелар уҡыусылары, “Китапхана ҡунаҡханаһы” һәм “Осрашыу” клубтары ағзалары өсөн Мәскәү филармонияһының академик симфоник оркестры башҡарыуында “Руслан һәм Людмила” операһына увертюра яңғыраны. Ҡунаҡтарға Михаил Глинканың тыуыуына 220 йыл тулыуға арналған “Рус классик музыкаһына нигеҙ һалыусы” әҙәби-музыкаль композицияһы тәҡдим ителде. Шулай уҡ музыка сәнғәте һәм донъяуи классик әҫәрҙәр ижад итеү тураһында “Музыка йөрәктәрҙә” китап күргәҙмәһе ойошторолдо. Был көндө тағы Межгорье ҡала китапханаһында виртуаль концерт залын асыу тантанаһы үтте. Сараға ҡала хакимиәте, мәғариф һәм мәҙәниәт учреждениелары вәкилдәре, ижади коллективтар һәм дөйөм белем биреү мәктәптәре уҡыусылары саҡырылды. Асылыу тантанаһы сиктәрендә Антон Чехов исемендәге Мәскәү театрының “Ҡатнаш хистәр” спектакле күрһәтелде. Ҡала халҡын китапхана мөдире Алла Михайлова ҡотланы: – Виртуаль концерт залы Рәсәй Мәҙәниәт министрлығының асыҡ мәҙәни киңлекте формалаштырыу өсөн мөһим проекты. Беҙ йәшәгән ябыҡ административ-территориаль ҡаланың үҙенсәлектәренә ҡарап, беҙҙең халыҡ сараларҙа һәр ваҡыт ҡатнаша алмай. Хәҙер мәҙәни сараларҙың Межгорье ҡалаһы өсөн асыҡ булыуына бик шатбыҙ. Бында халыҡ фильмдар, концерттар ҡарай аласаҡ. Киң форматлы экран һәм акустик система ҡарауға уңайлы булһа, концерттарҙың, спектаклдәрҙең, заманса постановкаларҙың күплеге иң талапсан тамашасыларҙың һорауҙарын ҡәнәғәтләндерә. Ҡала китапханаларында концерттарҙы бушлай күрһәтеү менән, классик музыка сәнғәте республика халҡына һәм ҡунаҡтарына туранан-тура асыҡ буласаҡ, унда һәр тамашасы илдең һәм донъяның музыкаль тормошондағы иң мөһим ваҡиғаларға ҡушыла аласаҡ. Радий Хәбиров та, Башҡортостан Башлығы ҡарамағындағы Мәҙәниәт һәм сәнғәтте үҫтереү мәсьәләләре буйынса Советтың беренсе ултырышында, хәҙерге заманда тап мәҙәниәт һәм әхлаҡи ҡиммәттәр йәмғиәтебеҙҙең төп нигеҙе булып тора, тип билдәләгәйне. Фотолар: Башҡортостан Мәҙәниәт министрлығының матбуғат хеҙмәте.