2024 йылдың 17-19 октябрендә Өфөлә “Рәсәй - спорт державаһы” халыҡ-ара спорт форумында ҡатнашыуға ике меңгә яҡын ғариза килгән. Ошо хаҡта республиканың спорт министры вазифаһын башҡарыусы Руслан Хәбибов аҙналыҡ оператив кәңәшмә барышында белдерҙе. Хәтерегеҙгә төшөрәбеҙ, илдең төп спорт форумы Башҡортостанда Рәсәй Президенты Владимир Путиндың ҡарары буйынса уҙа. Төп саралар 2024 йылдың 31 авгусында Өфөнөң 450 йыллығы уңайынан асылған Көрәш һарайында ойошторола. – Бында пленар өлөш, форумдың эш программаһы һәм Рәсәй Президенты ҡарамағындағы Физик культураны һәм спортты үҫтереү буйынса совет ултырышы үтәсәк, – тине Руслан Хәбибов. – Бина эргәһендә “Заманса спорт. Инновациялар һәм перспективалар” күргәҙмәһен ҡараясаҡ, унда алдынғы спорт төбәктәре һәм ойошмалары сығыш яһаясаҡ. Бынан тыш, төрлө ярыштар Башҡортостан баш ҡалаһының башҡа спорт объекттарында ла үтәсәк. Шулай итеп, “Өфө-Арена”ла “IBA Чемпиондар төнө” профессиональ бокс кисәһе һәм юниорҙар араһында кёрлинг буйынса Бөтә Рәсәй ярыштары үтәсәк. 17 октябрҙә “Динамо” спорт комплексында баскетбол буйынса “Юғары лига” Рәсәй чемпионаты матчы ойоштороласаҡ. Рима Баталова исемендәге спорт әҙерлеге үҙәге “Ватанды һаҡлаусылар кубогы” төбәк-ара ярыштарында ҡатнашыусыларҙы ҡабул итәсәк. Шулай уҡ форумды уҙғарыу барышында Ишкәкле слалом комплексын һәм Фехтование үҙәген асыу тантанаһы ҡаралған, унда Рәсәй йыйылма командаһы ҡатнашлығында “Ҡурай иле” халыҡ-ара ярыштары һәм үҫмерҙәр араһында “Салауат ҡылысы” ярышы үтә. – 19 октябрҙә Өфөлә Рәсәйҙең Олимпия комитеты менән берлектә “Йөрөү көнөн” үткәрәбеҙ, - тип өҫтәне Руслан Хәбибов. - Күмәк сарала 25 меңләп кеше - форумда ҡатнашыусылар, 200 Олимпия уйындары чемпионы һәм призеры, Өфө халҡы һәм ҡунаҡтары ҡатнашасаҡ. Улар “Спорт” туҡталышынан Ленин майҙансығына тиклем ике километр үтәсәк. Форумдың һуңғы көнө, 19 октябрь, Башҡортостандың спорт берләшмәһенә арнала. Программала – Физик культура һәм спорт буйынса төбәк советының киңәйтелгән ултырышы, шулай уҡ республиканың спорт йәмәғәтселеге һәм Өфө халҡы өсөн Асыҡ ишектәр көнө. Төбәк етәксеһе “Рәсәй - спорт державаһы” халыҡ-ара спорт форумын уҙғарыуға сифатлы әҙерлек кәрәклеген һыҙыҡ өҫтөнә алды. – Был – республикабыҙ өсөн быйыл иң ҙур сараларҙың береһе. Донъяның 100-ҙән ашыу иленән делегацияларҙың килеүе көтөлә – ул бер нисә мең ҡунаҡ, шул иҫәптән билдәле спортсылар, – тип йомғаҡ яһаны Радий Хәбиров. – Әлегә башҡараһы эштәр байтаҡ, күргәҙмә өсөн майҙансыҡ әҙерләргә кәрәк. Барыһын да ваҡытында өлгөрөрбөҙ тип ышанам. Фото: Башҡортостан Башлығы сайты.