Әлегә йылы бирмәйҙәр

Республиканың барлыҡ муниципалитеттары йылытыу миҙгелендә эшләүгә әҙерлек паспорттарын тапшырҙы. Был хаҡта Башҡортостан Башлығы Радий Хәбиров рәйеслегендәге аҙналыҡ оператив кәңәшмәлә төбәктең торлаҡ-коммуналь хужалыҡ министры вазифаһын башҡарыусы Ирина Голованова белдерҙе. Коммуналь инфраструктураны ҡышҡа әҙерләү барышында ҡалаларҙа йылылыҡ, һыу үткәргес һәм канализация селтәрҙәре, ҡаҙанлыҡ һәм насос ҡорамалдары ремонтланған, резерв яғыулығының норматив запастары булдырылған. Милли именлек фонды средстволарын йәлеп итеп, Краснохолмский ауылында ҡаҙанлыҡты яңыртҡандар һәм Учалыла ҡаҙанлыҡ төҙөгәндәр. Коммуналь инфраструктураны яңыртыу программаһы сиктәрендә Яңауылда, Күмертауҙа һәм Шишмәлә йылылыҡ менән тәьмин итеү селтәрҙәренә капиталь ремонт үткәрелгән. Белоретта йылылыҡ селтәрҙәрен ремонтлау тамамланды. Ростехнадзор 72 йылылыҡ менән тәьмин итеү ойошмаһын тикшергән – 236 ҡаҙанлыҡта 408 боҙоу осрағы асыҡланған. Иң күп иҫкәрмәләр – Әбйәлил, Белорет, Салауат, Туймазы, Өфө райондары һәм Октябрьский ҡалаһында. Уларҙы 15 октябргә тиклем бөтөрөргә тейештәр. Ирина Голованова әйтеүенсә, ҡышҡылыҡҡа әҙерлек паспорттарын күп фатирлы йорттарҙың 100 проценты алған. Шулай уҡ ҡышҡылыҡҡа әҙерлек сиктәрендә өй эсендәге йылытыу системаларын йыуҙырыу һәм гидравлик һынауҙар үткәргәндәр, йылылыҡты иҫәпләү приборҙарын ремонтлағандар һәм тикшергәндәр, йылылыҡ узелдарында элеваторҙарҙы һәм дроссель шайбаларын тикшергәндәр, үҙәк йылытыу торбаларын йылылыҡ үткәрмәүҙе тергеҙгәндәр. 2024 йылда йорттарға капиталь ремонт үткәргәндә 22 күп фатирлы йорттағы шәхси йылылыҡ пункттарын алмаштырҙылар, алты йорттағы йорт эсендәге йылытыу системаларын ремонтланылар, ике күп фатирлы йорттоң фасадтарын йылыттылар, сиратта – тағы ла ике йорт. Шулай уҡ алты йортта сарлаҡ таяуҙары йылытылды, дүртәүһендә эштәр бара. Уларҙы тамамлау ваҡыты – 10 октябргә тиклем. Торлаҡ һәм төҙөлөштө күҙәтеү буйынса дәүләт комитеты 8,6 меңдән ашыу йортто тикшергән, 2,5 мең иҫкәртеү биргән, 20 меңгә яҡын хоҡуҡ боҙоу осрағын асыҡлаған, шуларҙың 76 проценты бөтөрөлгән дә инде. Бында ҡалышыусылар иҫәбендә – Әбйәлил, Әлшәй, Стәрлетамаҡ, Фёдоровка һәм Хәйбулла райондары. Торлаҡ-коммуналь хужалыҡ предприятиелары 539 резерв электр менән тәьмин итеү сығанағы һәм 2 321 кешенән һәм 686 берәмек техниканан торған 352 авария-тергеҙеү бригадалары әҙерләгән. Бынан тыш, муниципаль бюджет учреждениелары, идара һәм хеҙмәтләндереү компаниялары ҡарамағында 3 меңдән ашыу коммуналь техника берәмеге бар. Муниципалитеттар 100 мең тонна боҙлауыҡҡа ҡаршы материалдар әҙерләгән дә инде. Йыл аҙағына тиклем уларға тағы 90 мең тонна өҫтәйәсәктәр. Министр вазифаһын башҡарыусы һауа температураһының күтәрелеүенә бәйле яҡын арала йылы биреү күҙалланмай тип өҫтәне. Башҡортостан Башлығы күҙәтеү органдары асыҡлаған етешһеҙлектәрҙе ҡыҫҡа ваҡыт эсендә бөтөрөргә ҡушты. – Дөйөм алғанда, яҡшы әҙерләнгәндәрен күрәм. Ошо эште дауам итеүегеҙҙе һорайым, - тине Радий Хәбиров. - Йылылыҡ биреүгә бәйле ҡарарҙы муниципалитеттар һәр ваҡыт һауа шарттарына ҡарап, министрлыҡ менән кәңәшләшеп ҡабул итә. Фото: Башҡортостан Башлығы сайты.