Үҙебеҙҙең егет!

Рәмил Мансуров... Был исем “Башҡортостан” гәзите уҡыусыһына яҡшы таныш. Ул баҫмабыҙҙа 2013 йылда Стәрлетамаҡ (көньяҡ) биләмәһе буйынса үҙ хәбәрсе булып эшкә килгәйне. Шул мәлдән алып уның мәҡәләләре гәзит биттәрендә бөгөнгө көнгә тиклем даими баҫылып тора. Шәхсән үҙен дә шул мәлдән алып беләм. Бөгөн Рәмил Ғәбдрәшит улы инде үҙе редакция етәкләй – ул Стәрлетамаҡ ҡалаһында сығып килгән “Ашҡаҙар” гәзитенең баш мөхәррире. Ғәҙәттә баш мөхәррир эше ойоштороу мәлдәре, гәзиткә яҙҙырыу, таратыу, коллектив, гәзит сығарыу, гәзиттең төҫөн, йөҙөн, эстәлеген билдәләү мәсьәләләренә ҡайтып ҡала. Ошо тиклем мәшәҡәт өҫтөнә ҡәләмдәшебеҙ мөхәррир вазифаһын уңышлы башҡарыу менән бер рәттән, журналист булараҡ, табаҡ-табаҡ мәҡәләләр яҙырға ла ваҡыт таба. Улай ғына ла түгел, уның яҙмалары һәр саҡ гәзит уҡыусыһының күңеленә үтеп инә. Сөнки Рәмил үҙенең мәҡәләләрен ябай, халыҡсан итеп яҙыуы менән алдыра. Ҡылыҡтары, эшмәкәрлектәре, тормоштары аша оҫта итеп ул кешеләрҙең эске донъяһын аса белә. Иманым камил, Рәмил прозаға тотонһа, унан бынамын тигән яҙыусы ла сығыр ине, әммә уныһы инде икенсе мәсьәлә. Шәхсән үҙем “Башҡортостан” гәзитенең үҙ хәбәрсеһе булараҡ, һәр саҡ райондарҙа-юлда, кешеләр араһында йөрөйөм һәм кешеләргә ошондай ябай, ихлас мәҡәләләр оҡшауына бер генә тапҡыр шаһит булманым. Әйткәс әйтәйек, шул командировка мәлдәрендә аралашҡан кешеләр Рәмил Мансуров мәҡәләре хаҡында һоҡланып, ҡыҙыҡһынып һөйләүенә лә тап булғаным бар. Рәмилдең махсус хәрби операция хаҡындағы, геройҙарыбыҙ, уларҙың яҡындары тураһындағы мәҡәләләре айырыуса иғтибарға лайыҡ. Был яҙмаларҙа батырҙарыбыҙҙың хәрби рухы ла сағыла, Ватан өсөн барған алыштың мәғәнәһен дә йәнә лә ябай, әммә бик аңлайышлы итеп асып бирә. Яугирҙәр, уларҙың яҡындары, яу мәлдәре, гуманитар ярҙам – барыһы ла урын алған был яҙмаларҙа. Ә быйыл коллегамдың яҙ аҙағы–йәй башында махсус хәрби операция биләмәһенә командирвкаға юлланыуын ишеткәс, дөрөҫөн әйткәндә, бер аҙ уның өсөн борсолоп та ҡуйғайным. Өс йәш бала атаһы, тынғыһыҙ... Әммә, шөкөр иҫәнүимен әйләнеп ҡайтып, ул бер юлы бер нисә гәзиттә геройҙарыбыҙ хаҡында бихисап мәҡәлә баҫтырҙы, был яҙмалар әле лә дауам итә. Әлеге репортаждарҙа Рәмил Мансуров үҙенә генә хас оҫталығы менән яугирҙәребеҙҙең ҡылыҡтары аша уларҙың батыр рухын һүрәтләй, ни өсөн ҡулдарына ҡорал алыуын аса. Был репортаждарҙа яҡташлыҡ көсө, берҙәмлек, яуаплылыҡ һымаҡ төшөнсәләргә айырыуса иғтибар бирә автор. Шуныһы ла иғтибарға лайыҡ: журналист репортажын шул тиклем “тәмле" яҙа, хатта үҙең дә бер мәлгә шул егеттәр араһында йөрөйһөң йә ҡулыңа автомат алып дошманға тоҫҡайһың, йә бына–бына өҫтөңә дошман осоусы аппараты төшөргә тора... Был яҙмалар мауыҡтырғыс ҡына түгел, мөһим дә. Батырҙарыбыҙға ҡарата хөрмәт, йәш быуында патриотик рух тәрбиәләүҙә, берҙәмлегебеҙҙе көсәйтеүҙә мөһим! Был яҙмаларҙың китап булып тупланып әлеге ваҡытта фронтта булған геройҙарҙың үҙҙәренә барып етеүе икеләтә ҡыуаныслы. Тағы ла бер күренеште билдәләмәй булдыра алмайым: Рәмил Ғәбдрәшит улы был мәҡәләләрҙе “гәзит өсөн кәрәк булғанға” түгел, ә ысын күңелдән, бар эске донъяһы менән Еңеүгә ышанып, батырҙарыбыҙға һоҡланып, улар өсөн борсолоп, уларҙың данын арттырам тип яҙа! Был эскерһеҙ хистәрҙе уның шәхсән рәүештә Стәрлетамаҡ ҡалаһында махсус хәрби операция геройҙарына арнап “Беҙ бергә” исемле спорт-мәҙәни фестивале ойоштороуы ла дәлилләп тора. Башҡортостандан ғына түгел, хатта Мәскәүҙән һәм Рәсәйҙең башҡа төбәктәренән өс йөҙҙән ашыу кеше ҡатнашҡан һәм үҙенең эсенә көрәш, шахмат буйынса турнирҙарҙы, шиғырҙар конкурсын алған был сара бер юлы спортты ла, патриотик тәрбиәне лә үҫтерә, батырҙарыбыҙ хаҡында хәтерҙе лә мәңгеләштерә. Был изге эш үҙе ҙур маҡтауға лайыҡ! Ошо көндәрҙә Рәмил Мансуровтың журналистар араһында үткәрелгән Шәһит Хоҙайбирҙин исемендәге премияға дәғүә итеүен ишетеп, бик ҡыуандыҡ, сөнки беҙ уның конкурс комиссияһына тәҡдим иткән эштәре буйынса ғына түгел, ә бөтә ике тиҫтәнән ашыу йыл тәшкил иткән журналист булмышы менән дә лайыҡ икәнен беләбеҙ, уның кандидатураһын хуплайбыҙ! Ул үҙебеҙҙең егет! Уңыштар һиңә, ҡәләмдәш! Фото: Рәмил Мансуровтың шәхси арихивынан