“Әгәр мин “Йәйғор”ға юллама отһам...”

Башҡортостандың атҡаҙанған уҡытыусыһы, физиканан белем биргән Фәнүзә Хәкимованы Бөрйән халҡы сикһеҙ ихтирам итә, уға оло ышаныс бағлай. Балаларҙы яратҡан, һөнәри бурыстарын ҙур яуаплылыҡ менән атҡарған, изге күңелле педагогтың уҡыусылары ата-әсәләрен, райондаштарын уңыштары менән даими һөйөндөрөп тора. – Мин 1972 йылда Ишембай районының Ялтыран ауылында тыуғанмын. Атай-әсәйем Бөрйәндән булғанға, ғаиләбеҙ менән Иҫке Собханғолға күсеп килгәнбеҙ – ти Фәнүзә Әҡсән ҡыҙы. – Мәктәп йылдарында бик әүҙем комсомолка булдым. Гармунда уйнап, йырлап йөрөй торған инем. Телевидениела “Йәйғор” тапшырыуында сығыш яһағаным да иҫемдә. Республикала, унан ситтә үткән төрлө олимпиадаларҙа ҡатнаша торғайным. Физика, математика, химия фәндәре миңә еңел бирелде. 1989 йылда Иҫке Собханғол урта мәктәбен тамамлап, Башҡорт дәүләт педагогия институтының (хәҙерге БДПУ) физика-математика факультетына уҡырға индем. 1994 йылда уны ҡыҙыл дипломға тамамлап, Бөрйәндең Яңы Собханғол урта мәктәбендә эш башланым. 1995 йылдан иһә үҙем уҡыған Иҫке Собханғол урта мәктәбенә күстем. Уҡыусыларым физиканан имтихан тапшырып, юғары уҡыу йорттарына инә башланы, төрлө олимпиадаларҙа ҡатнаштылар. 2002 йылда республикала үткән “Йыл уҡытыусыһы” конкурсында лауреат булып, утыҙ йәшемдә Башҡортостандың атҡаҙанған уҡытыусыһы исеменә лайыҡ булдым. Беренсе Президентыбыҙ Мортаза Рәхимов ҡулынан премия һәм награда алырға насип итте. Ул бүләкләү мәлендә: “Фәнүзә Хәкимова гармунда ла уйнай, – тине лә, – әйҙә, йырлап ебәр але!” – тип өҫтәне. Тулҡынланһам да, “Йөрәктән булһа” тигән йырҙың бер куплетын башҡарғайным шунда... Ғаилә хәлемә килгәндә, 1997 йылда үҙебеҙҙең ауыл егете Ринат Рауил улы Хәкимовҡа кейәүгә сыҡтым. 1998 йылда улыбыҙ Азамат, 2003 йылда ҡыҙыбыҙ Лилиә тыуҙы. Балаларыбыҙ икеһе лә мәктәптә ныҡ һәйбәт уҡыны, физика буйынса олимпиадаларҙа еңеүҙәр яулап, Өфө дәүләт нефть техник университетына һынауһыҙ ҡабул ителделәр. Улыбыҙ юғары уҡыу йортон уңышлы тамамлап, эшләп йөрөй. Ҡыҙыбыҙ әле дүртенсе курста. Фәнүзә Әҡсән ҡыҙының уҡыусылары республикабыҙҙың, илебеҙҙең төрлө юғары уҡыу йорттарында яҡшы белем ала, уңыш-ҡаҙаныштары менән һөйөндөрөп тора. Быйылғы БДИ һөҙөмтәләре лә юғары. Мәҫәлән, уҡыусыһы Айлина Аҡыева физиканан 100 балл йыйыуға өлгәшкән. “Киләсәгебеҙҙе үҙ ҡулына аласаҡ балаларыбыҙҙы тәрбиәле, аңлы, Ватаныбыҙ өсөн кәрәкле, тырыш, ғәҙел итеп тәрбиәләйек, һәләттәрен төрлө яҡлап үҫтерергә тырышайыҡ. Үҙебеҙҙе генә уйламаһаҡ ине. Килер быуынды хәстәрләһәк, киләсәгебеҙ тыныс булыр”, – ти уҡытыусы. “Ә “Башҡортостан” гәзите үткәргән конкурста еңеп, “Йәйғор” шифаханаһына юллама оторға теләр инегеҙме?” – тигән һорауға: “Әлбиттә. Был бүләкте өлөшөмә төшкән көмөшөм тип ҡабул итер инем. Ғөмүмән, яҡшы ялһыҙ һөҙөмтәле эшләп булмай ул. Күңел торошон, һаулыҡты хәстәрләп торорға кәрәк. Бына әле беҙгә, уҡытыусыларға, ярыш сәме өҫтәгән, күңелебеҙҙе күргән “Башҡортостан” гәзите редакцияһына рәхмәт!” – тип яуапланы Фәнүзә Әҡсән ҡыҙы. Ҡәҙерле дуҫтар! "Башҡортостан" гәзитенең "Бәйләнештә" төркөмөндә барған “Уҡытыусы – ниндәй гүзәл исем!” конкурсында ҡатнашыусылар өсөн әүҙем тауыш биреүегеҙҙе һорайбыҙ. Төп бүләк - Өфөләге "Йәйғор" шифаханаһына ун көнгә юллама. Фотолар Ф. Хәкимованың шәхси архивынан.