Ул үҙе лә ҡояш кеүек...

"Уҡытыусы – ниндәй гүзәл исем!” конкурсында ҡатнашыусылар менән таныштырыуҙы дауам итәбеҙ. Илеш районы Ишҡар урта мәктәбенең башҡорт теле һәм әҙәбиәте уҡытыусыһы Гүзәл Саҙретдинова тураһында һүҙебеҙ. Гүзәл Мөнәүир ҡыҙы бала саҡтан ижадҡа тартылып үҫә, туған тел һәм әҙәбиәт дәрестәрен, театр сәнғәтен ярата, матур итеп шиғырҙар һөйләй. Заманында “Башҡортостан пионеры” (хәҙерге “Йәншишмә”) гәзитенең “Йәш хәбәрсе”һе тигән маҡтаулы исеменә лайыҡ булып, Өфөлә йәш хәбәрселәрҙең 1-се слетында ҡатнашыу бәхете тейә уға. Башҡорт теленә булған һөйөүе 1988 йылда уны БДУ-ның башҡорт теле һәм журналистика факультетына алып килә. 1992 йылдан Илеш районы Ишҡар урта мәктәбендә эшләй. Бөгөн тырыш, алдына аныҡ һәм ҙур маҡсаттар ҡуйып эшләгән уҡытыусының уҡыусылары республика күләмендә үткәрелгән төрлө конкурстарҙа еңеү яулай, олимпиадаларҙа әүҙем ҡатнаша. Гүзәл Мөнәүир ҡыҙы мәктәптәге “Осҡон” театрын етәкләй. Уҡыусылары менән төрлө конкурстарҙа ҡатнашып, урындар яулайҙар. Әлеге көндә ике уҡыусыһы Өфө “Нур” татар дәүләт театрында эшләй, бер уҡыусыһы З. Исмәғилев исемендәге Өфө дәүләт сәнғәт институтының театр бүлегендә 3- сө курсында белем ала. Гүзәл Саҙретдинова бөгөн дә нәфис һүҙ сәнғәтенә тоғро. “Минең Рәми” төбәк-ара шиғриәт конкурсында 2-се урынға лайыҡ булыуы ла ошоға дәлил. Фиҙакәр хеҙмәте һөҙөмтәһендә яулаған уңыш-ҡаҙаныштары ла бихисап. Төбәк-ара “Башҡорт теле һәм әҙәбиәте уҡытыусыһы – 2021” конкурсында уңышлы сығыш яһап, Бөтә донъя башҡорттары ҡоролтайының иң юғары бүләгенә – “Ал да нур сәс халҡыңа!” миҙалына лайыҡ була. “Башҡорт теленә сикһеҙ һөйөү уята алған уҡытыусыларым Хәсәнова Рәмилә Ҡәнзәфәр ҡыҙы, Зәйнетдинова Фәнзирә Һаҙый ҡыҙы, Фәхруллина Гөлфая Әүхәҙи ҡыҙынан уңдым һәм уларға йөрәк түремдән сыҡҡан ихлас рәхмәт һүҙҙәрен еткерәм”, – ти Гүзәл Мөнәүир ҡыҙы. Уҡытыусы һөнәренең асылы, төп тәғәйенләнеше тураһында һорауға яуап биреп, ул былай тине: – Уҡытыусы булып эшләй башлауыма ла өс тиҫтә йылдан артып китте һәм йылдар уҙған һайын был һөнәрҙең минең булмышым, яҙмышым икәнен нығыраҡ аңлай барам. Быны раҫлап, һәләтле уҡыусыларым район, республика күләмендә үткәрелгән конкурстарҙа, олимпиадаларҙа лайыҡлы урындар ала; уҡытыусы һөнәрен һайлап, мин һалған мәңгелек һуҡмаҡтан барыусылары ла бар. Мин бөгөн үҙемде иң бәхетле кешеләрҙең береһе тип әйтә алам: яратҡан эшем, ышаныслы хеҙмәттәштәрем, ныҡлы терәгем һәм таянысым – улым, ҡыҙым, тормош иптәшем, дуҫтарым, туғандарым бар. Һәр көн, ҡояштай балҡып, яратҡан эшемә – балалар күңеленә кешелеклелек орлоҡтарын сәсеү, намыҫлылыҡ, тоғролоҡ, дуҫлыҡ, шәфҡәтлелек кеүек әхлаҡ сифаттары тәрбиәләү өсөн уҡыусыларым янына ашығам һәм үҙемде башҡа һөнәр кешеһе итеп күҙ алдына ла килтерә алмайым. Ысынлап та, үҙ эшен яратҡан, ошо изге һөнәрҙе ғүмерлек тәғәйенләнеше иткән уҡытыусыларҙың үҙҙәрен дә ҡояшҡа тиңләргә булалыр. Ер йөҙөндәге бар тереклекте йылытҡан, яҡтыртҡан, көс биргән ҡояш кеүек, улар ҙа бәләкәй генә ҡыҙ һәм малайҙарҙың тормошона нур һибеп, күңелдәренә изгелек орлоҡтары һалып ысын Кеше итеп үҫтерә. Фотолар: Г. Саҙретдинованың шәхси альбомынан.