Бөгөн, 3 октябрҙә, Өфөләге Колонналы залда Уҡытыусылар көнө айҡанлы матур сара уҙҙы. Унда республикабыҙҙың иң яҡшы башҡорт, рус, туған телдәр уҡытыусылары, полилингваль нигеҙҙә эшләгән белем усаҡтарының педагогтары тәбрикләнде. Алдынғы ҡарашлы, тәжрибәле мөғәллимдәр араһында үткәрелгән конкурстарҙа еңеү яулаусыларға 50 мең һум күләмендәге премия тапшырылды. Быйыл конкурстың республика комиссияһына 198 эш тәҡдим ителгән. Шулар араһынан 75 башҡорт теле, 67 рус теле, 27 туған тел, 29 полилингваль күп профилле дөйөм белем биреү ойошмалары уҡытыусыһы Башҡортостан Хөкүмәтенең аҡсалата дәртләндереүенә лайыҡ булды. Сараны Башҡортостан Хөкүмәте Премьер-министрының беренсе урынбаҫары вазифаһын башҡарыусы Урал Килсенбаев асып, педагогтарға изге теләктәрен еткерҙе. – Республика етәкселеге милләт-ара дуҫлыҡты һаҡлау, Башҡортостанды төйәк иткән халыҡтарҙың рухи, мәҙәни, мәғрифәти үҫешенә булышлыҡ итеү йәһәтенән маҡсатлы эштәр алып бара. Беҙ ошоноң менән көслөбөҙ. Ә инде уҡытыусы һөнәренә килгәндә, ул – һәр кемдең күңел түрендә урын алған изге лә, яҡын да кеше. Беҙҙең һәр беребеҙҙең йөрәгебеҙҙә ғүмер буйы рәхмәт хисе йөрөткән уҡытыусыларыбыҙ бар. Бөгөн һеҙ йәш быуынға белем биреп ҡалмайһығыҙ, балаларыбыҙ күңелендә юғары ҡиммәттәр – илһөйәрлек, тыуған ергә һөйөү, хеҙмәт яратыу, изгелек, яҡшылыҡ тойғолары тәрбиәләйһегеҙ, – тип билдәләне Урал Таһир улы. Аҡсалата премияға лайыҡ булған педагогтарҙы БР мәғариф һәм фән министры урынбаҫары Әлфиә Ғәлиева, БР Дәүләт Йыйылышы - Ҡоролтайҙың Фән, мәғариф, мәҙәниәт, йәштәр сәйәсәте һәм спорт буйынса комитеты рәйесе урынбаҫары Заһир Хәкимов, М. Аҡмулла исемендәге Башҡорт дәүләт педагогия университеты ректоры Салауат Сәғитов ихлас күңелдән ҡотланы. Салауат Тәлғәт улы үҙ сығышында халыҡ шағиры Мостай Кәримдең “Әсәнән ҡала тик бер генә затҡа табынам, уның исеме – Уҡытыусы” тигән һүҙҙәрен иҫкә төшөрҙө һәм был исемдең бөгөн дә ғорур яңғырауын, республикабыҙҙа үҙ эшенә бөтә күңелен һалған һоҡланғыс педагогтарҙың күп булыуын билдәләне. Хеҙмәттәре лайыҡлы баһаланған мөғәллимдәр хөрмәтенә моңло йырҙар яңғыраны. Башҡортостандың халыҡ артисы Алһыу Бәхтиева башҡарыуындағы “Уҡытыусыма” йырына бөтә зал ҡушылды. Премияға лайыҡ булған уҡытыусылар исеменән сығыш яһаусылар республикабыҙҙа башҡорт, рус, туған телдәрҙе уҡытыуҙың юғары кимәлдә ойошторолоуын, һуңғы йылдарҙа полилингваль белем биреү системаһының ныҡлы үҫешеүен, ә инде ошоноң ише конкурстар эшкә тағы ла дәртләндереүен әйтте. – Бөгөн Башҡортостаныбыҙҙа “Мин – башҡорт теле уҡытыусыһы!” тип ғорурланып әйтерлек шарттар тыуҙырыла, – тине үҙенең сығышында Борай районы Борай ауылындағы 2-се гимназия уҡытыусыһы Ләйсән Ришат ҡыҙы Муллағәлиева. – Һөҙөмтәле эшләр өсөн иң мөһиме һөнәреңде яратырға кәрәк. Мин үҙемдең эшемде, студенттарымды яратам. Буласаҡ уҡытыусыларҙа телгә һөйөү, ғорурлыҡ тәрбиәләү өсөн бар көсөмдө һалам. Эшемә ҡыуанып барам. Юғары һөҙөмтәгә өлгәшеүҙә ғаиләм дә ныҡлы терәк булып тора, – тине Б. Мәмбәтҡолов исемендәге Сибай педагогия колледжының тәжрибәле башҡорт теле уҡытыусыһы Гөлнара Мөхәррәм ҡыҙы Шакирова. Бүләкләнеүселәр араһында йәштәрҙең булыуы айырыуса ҡыуандырҙы. Баш ҡаланың 42-се лицейы уҡытыусыһы Әлфинә Таһир ҡыҙы Ғәбиҙуллина етенсе йыл башҡорт теленән белем бирә. “Һөнәрем оҡшай. Конкурста еңеү яулау эшкә дәртемде тағы ла арттырҙы, шул уҡ ваҡытта яуаплылыҡ та өҫтәне”, – ти ул. Республикабыҙҙың барлыҡ уҡытыусыларын һөнәри байрамдары менән ҡотлап, ныҡлы һаулыҡ, яуаплы, тынғыһыҙ, әммә иҫ киткес кәрәкле хеҙмәттәрендә уңыштар, яңынан-яңы ҡаҙаныштар теләйбеҙ. Айрат Нурмөхәмәтов фотолары.