Мутлашыусыларҙың ҡорбаны – күп осраҡта 30 йәштән өлкән граждандар, ә был юлы енәйәтселәр 23 йәшлек ҡыҙҙы алдаған. Өфөнөң 3-сө полиция бүлегенә баш ҡалала йәшәүсе ҡыҙҙан мутлашыу тураһында ғариза алынған. Ул 14 сентябрҙә үҙен мобиль оператор хеҙмәткәре тип таныштырған билдәһеҙ кешенең шылтыратыуы тураһында хәбәр иткән. “Оператор” ҡыҙға сим-картаның ғәмәлдә булыу ваҡытын оҙайтыу кәрәклеге тураһында хәбәр итә һәм sms-кодты һорай. Билдәһеҙ әҙәмгә ышанып, ул Дәүләт хеҙмәттәре порталына инеү кодын һәм ике паролен әйтә. Шул уҡ кистә ҡыҙ Дәүләт хеҙмәттәре аккаунтына рөхсәтһеҙ инеүҙәре тураһында хәбәр ала. Ҡыҙ, хәбәргә яуап итеп, үҙ ҡоролмаһынан инеүсе булмауын белдерә. Һуңынан уға билдәһеҙ номерҙан шылтыраталар. Ярҙам хеҙмәтенәнмен тип таныштырған кеше ҡыҙға Үҙәк банк хеҙмәткәре менән бәйләнешкә инергә тәҡдим итә. Ул ризалаша, һәм банктан аҡса күсереү буйынса белгес шылтыратып, ҡыҙҙы кредит алырға һәм аҡсаны махсус бүлеккә күсерергә күндерә. Ҡыҙ инструкцияларҙы үтәргә банкка юллана. Банк хеҙмәткәрҙәре был клиенттың шикле ғәмәлдәренә иғтибар итә һәм уның менән мутлашыуҙар тураһында һөйләшеү ҙә үткәрә. Әммә, иҫкәртеүҙәргә ҡарамаҫтан, ҡыҙ үҙаллы эш итеүен дауам итә. Сумманы алғас, ул төрлө иҫәптәргә миллион ярымдан ашыу аҡса күсерә. Бер нисә көндән һуң мутлашыусылар уның менән тағы бәйләнешкә инә, кредит потенциалын кәметеү өсөн аҡса күсереү кәрәклеге тураһында хәбәр итә. Ҡыҙ ҡабаттан банкка барып, займ ала, алынған аҡсаны күрһәтелгән иҫәптәргә күсерә. Был процедураны ул бер нисә тапҡыр – банк аҡса биреүҙе туҡтатҡанға тиклем - ҡабатлай. Бынан һуң ҡыҙ ҙур сумма аҡсаны дуҫтарынан һорап мөрәжәғәт итә башлай. Улары үҙ сиратында хәлде ҡыҙҙың ата-әсәһенә еткерә һәм уға мутлашыусылар ҡорбаны булыуын аңлата. Дөйөм алғанда, Өфө ҡыҙы енәйәтселәргә 4 миллион һумдан ашыу аҡса күсергән. Башҡортостан Республикаһы буйынса Эске эштәр министрлығы иҫкәртә: бер ҡасан да таныш булмаған кешеләргә SMS менән ебәрелгән кодты хәбәр итмәгеҙ! Мутлашыусылар төрлө ойошмаларҙың, шул иҫәптән Дәүләт хеҙмәттәре, Үҙәк банк, ФСБ һәм башҡаларҙың хеҙмәткәрҙәре булып, һеҙҙең мәғлүмәттәрегеҙҙе һорарға мөмкин. Иҫегеҙгә төшөрәбеҙ: бер учреждение ла һеҙҙән таныш булмаған иҫәптәргә финанс күсереүҙе талап итмәйәсәк. Башҡортостан Республикаһы буйынса Эске эштәр министрлығының матбуғат хеҙмәте.