Бөгөн һәр кем тиерлек физик күнекмәләрҙең, спорттың кеше тормошонда мөһим урын биләүен, һаулыҡты нығытыуҙа кәрәклеген, әүҙем тормоштоң мөһим икәнлеген бик яҡшы аңлай. Тиккә генә электән “Һаулыҡ – ҙур байлыҡ” тип әйтмәгәндәр. Ошо һүҙҙәрҙең мәғәнәһе көндән-көн баҙыҡлана бара. Өҫтәүенә һуңғы йылдарҙа республикала спорт объекттары күпләп төҙөлә, булғандары сынъяһау ителә. “Спорт йүнәлешендә эштәр дауам итә. Артабан да матди-техник база яңыртыласаҡ, яңы ҙур объекттар төҙөләсәк. Бассейны һәм физкультура-һауыҡтырыу комплексы булмаған райондарҙа улар төҙөләсәк”, - тип белдергәйне Башҡортостан Башлығы Радий Хәбиров. Башҡортостанда төрлө саралар үткәрелә, Мәҫәлән, 21 сентябрҙә Өфөлә Бөтә Рәсәй “Милләттәр кросы” ойошторола. Быйыл спорт байрамы “Ҡашҡаҙан” паркында була. Ғәҙәттәгесә, сарала дөйөм белем биреү ойошмаларында, лицей, гимназия, колледж, техникум һәм юғары уҡыу йорттарында уҡыусылар, төрлө ойошмалар, предприятиелар хеҙмәткәрҙәре, ветерандар һәм йүгереүсе һәүәҫкәрҙәр ҡатнаша. Әйткәндәй, 2019 йылдан алып “Милләттәр кросы” Рәсәйҙең Спорт министрлығы тарафынан әҙерләнгән һәм тормошҡа ашырылған “Спорт – йәшәү нормаһы” федераль проектының бер өлөшө булып тора. Уның маҡсаты – 2024 йылдан Рәсәйҙә физик культура һәм спорт менән шөғөлләнеүселәр һанын илдәге халыҡтың дөйөм өлөшөнән 55 процентҡа тиклем арттырыу. Былтыр республикала был сарала 70 меңдән ашыу кеше ҡатнашты. Күмәк спорт сараһы “Демография” милли проектының (национальный проект “Демография”) “Спорт - йәшәү нормаһы” федераль проекты сиктәрендә үткәрелде. Спортсыларҙың күбеһе - 10 мең самаһы - Өфөлә стартҡа сыҡты. Артабан Туймазы районы ҡатнашыусылары әүҙем булды - 7398. Өсөнсө урынды Иглин һәм Бөрө райондары биләне, улар яҡынса бишәр мең йүгереүсене берләштерҙе. «Һандар үҙҙәре үк һөйләй. Башҡортостан сираттағы тапҡыр илдең иң спортҡа ылыҡҡан төбәктәренең береһе исемен раҫлай», - тип билдәләгәйне Башҡортостандың спорт министры Руслан Хәбибов. Башҡортостандан тыш, спорт сараһы Мәскәүҙә, Санкт-Петербургта, Екатеринбургта, Барнаулда, Красноярскиҙа, Ҡазанда, Пермдә, Волгоградта, Новосибирскиҙа һәм Ырымбурҙа уҙҙы. Был шәмбе үткәреләсәк “Милләттәр кросы-2024” йүгереүендә ҡатнашығыҙ. Тотош Рәсәйҙең төбәктәрен берләштергән был сарана ситтә ҡалмағыҙ. Түбәндәге һылтанма буйынса инеп теркәлергә мөмкин: https://www.gosuslugi.ru/landing/sport Айрат Нурмөхәмәтов фотолары.