БДБ илдәре киләһе йылға маҡсаттар ҡуйҙы

Ултырышта БДБ дәүләттәренең Дәүләт-ара гуманитар хеҙмәттәшлек фонды идараһы рәйесе Полад Бюльбюль уғлы, Идара рәйестәше Михаил Швыдкой, Дәүләт-ара советтың башҡарма директоры АнатолийИксанов һәм БДБ илдәренең гуманитар хеҙмәттәшлек органдары вәкилдәре ҡатнашты. Фонд идараһы быйылғы эшмәкәрлеккә йомғаҡ яһаны һәм 2024 йылда экономияланған аҡса иҫәбенә тормошҡа ашырыласаҡ өҫтәмә проект индерҙе. Был сара «Аҡ таяҡ» хәйриә фестивале булды, уны Диана Гурцкая фонды ойоштора. 2025 йылға Фондҡа 115 ғариза килгән, шуларҙың 54-е хупланған. Йәш ғалимдар йәнә Дубна ҡалаһындағы Нанотехнологиялар үҙәгендә стажировка үтәсәк. Билдәле фән һәм мәҙәниәт эшмәкәрҙәре, шулай уҡ уларҙың йәш коллегалары «Берҙәмлек йондоҙҙары» һәм «Дебюттар берҙәмлеге» премияларына дәғүә итә ала. Йәштәр симфоник оркестры гастролгә юлланасаҡ. Минскиҙағы йәйге йәш тарихсылар мәктәбе, Санкт-Петербургта китапханаларҙың, архивтарҙың һәм музейҙарҙың тарихи мираҫын һаҡлау буйынса интеграциялы форум, Бишкәктә ҡыҫҡа метражлы фильмдар фестивале Бойондороҡһоҙ Дәүләттәр Берләшмәһендә иғлан ителгән Бөйөк Ватан һуғышында Еңеүҙең 80 йыллығына – Нацизмға ҡаршы көрәштә тыныслыҡ һәм берҙәмлек йылына арналасаҡ. Азербайжан тәүге тапҡыр интеллектуаль күпбәйге буйынса студенттар турнирын үткәрә. Үзбәкстан халыҡ ижадын башҡарыусыларҙы Бахша фестиваленә йыя. Ҡаҙағстанда кино белгестәре менән тәнҡитселәрҙең сираттағы осрашыуы уҙа. Тажикстанда милли мәғариф системаларының үҙ-ара эш итеү мәсьәләләрен Берләшмә илдәре уҡытыусылары тикшерәсәк. Ошо һәм башҡа саралар Фондтың эш планына индерелде. Билдәле булыуынса, Өфөлә 16-19 сентябрҙә тәүге тапҡыр БДБ-ның ижади һәм фәнни интеллигенцияһы форумы үткәрелә. Халыҡ-ара форумда берләшмә илдәренән 200-гә яҡын вәкил ҡатнаша. Ул 2006 йылдан төрлө илдәрҙә ойошторола. Рәсәйҙә форум дүртенсе тапҡыр үтә. Бойондороҡһоҙ Дәүләттәр Берләшмәһенең ижади һәм фәнни интеллигенцияһы форумы – йыл һайын ойошторолған ҙур гуманитар сара. Бында алдағы йылға йомғаҡтар яһала, берлектәге эшмәкәрлек пландары тикшерелә, фән, мәғариф, мәҙәниәт, мәғлүмәт, туризм, спорт өлкәһендә үҙ-ара эш итеүҙең мөһим мәсьәләләре ҡарала.