Башҡортостан Рәсәйҙең бүтән субъекттарына һәр йәһәттән дә өлгө булып тора. Төҙөлөш тармағы тиһеңме, агросәнәғәт комплексы булһынмы, һаулыҡ һаҡлау йүнәлешеме, бүтән өлкәләрҙе телгә алыу артыҡ, республикабыҙҙа бөтә яҡлап та алға китеш күҙәтелә. Форсаттан файҙаланып, күп фатирлы йорттарҙағы подъездарына һуғылдыҡ. Ысынлап та, Башҡортостан Башлығы Радий Хәбиров халыҡтың йәшәйешенә уңайлыҡтар тыуҙырыуға һәр ваҡыт етди ҡараны, әле лә ошо йүнәлештә уй-маҡсаттарҙы бойомға ашыра. – Кешенең кәйефе нимәгә бәйле булыуы тураһында йыш ҡабатлайым, – тине Өфө районында ойошторолған семинар-кәңәшмәлә сығыш яһағанда республика етәксеһе Радий Хәбиров. – Әйтәйек, ул иртәнсәк бысраҡ подъезға сыҡты, ти, унан ихатаға юл тотто, бында ла тубыҡтан батҡаҡ, билдәле, уның кәйефе шунда уҡ төшә. Ә бына әгәр ҙә тәҙрә төптәрендә сәскәләр күҙҙең яуын алып ултырған, стеналарға матур һүрәттәр төшөрөлгән, бер һүҙ менән әйткәндә, шундай күркәм подъезға килеп инеү – бөтөнләй бүтәнсә. Беҙгә уңайлы мөхит булдырыу кәрәк, иң мөһиме, бына ошо. Шул шатлыҡлы, Башҡортостанда төрлө йүнәлештә уй-маҡсаттар уңышлы тормошҡа ашырыла. Планлы эштәрҙең барыһы ла кешеләргә йәшәйештә еңеллек тыуҙырыуға туранан-тура бәйле. Элек, дөрөҫөрәге, 2018 йылға ҡәҙәр подъездар ватылыу-ҡыйралыу хәленә еткерелгәйне. Ә инде Радий Хәбиров Башҡортостан Башлығы вазифаһында эшләй башлағас та был юҫыҡта ыңғай яҡҡа үҙгәрештәр күҙәтелде, республика етәкселеге насар хәлдәге подъездарҙы тулыһынса тәртипкә килтереүгә тотондо. – Халыҡ мәнфәғәтен хәстәрләү – өҫтөнлөклө йүнәлештәрҙең береһе, иң мөһиме, һәр кем һәр яҡлап та уңайлыҡтары булған шарттарҙа көн итһен, – тине Радий Хәбиров. – Әйтәйек, иртәнсәк фатирҙан сыҡтың, ә подъезд йыйыштырылған һәм унда бөхтәлек, шәп бит! Был һис кенә лә хыял түгел, ә – ысынбарлыҡ. Беҙ күп фатирлы йорттарҙағы подъездарҙы планлы рәүештә тәртипкә килтерәбеҙ. Бындағы халыҡ эштәр барышын үҙе тулыһынса күҙәтеү аҫтына алған, уны ҡабул иткәндә лә әүҙем ҡатнаша. Подрядчик кәмселектәрҙе бөтөрмәй тороп, актҡа ҡул ҡуйылмай, аҡса ла түләнмәй. Ысынында, бындай ыҫпайлыҡты күргәндән һуң кәйеф бермә-бер күтәрелә. Башҡортостанда 2019 йылдан алып күп фатирлы йорттарҙа подъездарҙы тулыһынса ремонтлау тәңгәлендә программа уңышлы бойомға ашырыла башланы. Ауылдарҙы төҙөкләндереү булһынмы, ял урындарын күркәмләндереү тиһеңме, подъездарға икенсе һулыш биреүме, матур ҙа, кәрәкле лә ошо башланғыстарҙың бөтәһе лә Башҡортостан Башлығының оло хәстәрлеге. Мәҫәлән, Өфө ҡалаһының Дағстан урамы, 13/1 йортондағы подъездарҙы хәҙер танырлыҡ та түгел. 2018 йылға ҡәҙәр подъезд төбө сүплеккә күмелгәйне, эскә инеү менән шулай уҡ тәмәке төпсөгө, араҡы һәм һыра шешәләре "ҡаршы алды", етмәһә, һаҫыҡ еҫ тынды быуҙы, был урындан йәһәтерәк тайыу яғын ҡараны һәр кем. Хәҙер иһә бөтөнләй башҡаса күренеш. Подъезд ишеген асып ингәс тә балаҫҡа тартым йәймәгә аяҡ баҫа кешеләр. Баҫҡыс тотҡостары шул хәтлем уңайлы итеп эшләнгән. Таҙа баҫҡыстарҙы күреп күңел ҡыуана. Унан инде стеналарға күңелдәрҙе күтәрерлек төрлө һүрәттәр төшөрөлгән, гәзит-журнал йәшниктәре ҡул етерлек урынға эленгән. Ә инде тәҙрә төптәрендәге сәскәләр күҙҙең яуын алырлыҡ. Бындағы матурлыҡты һөйләп аңлатырлыҡ түгел. Барыһын да үҙ күҙҙәребеҙ менән күрергә кәрәк. Хатта подъезға туфлиҙы сисеп инге килә, сөнки бында – өйҙәге шикелле бөхтәлек һәм таҙалыҡ. Дағстан урамы, 13/1 йортондағы бер нисә кеше менән әңгәмәләштек. Рөстәм Имелбаев һөйләүенсә, ул үҙ ғүмеремдә бер нисә фатир алмаштырған, әммә бындай күркәм подъезд менән беренсе тапҡыр осрашҡан. Бынан алты йыл элек подъездар ҡот осҡос хәлдә булған, унда шикле әҙәмдәр ҙә йыш уралған, хатта эскелек ойошторғандар. – Бөгөн бөтөнләй башҡаса донъя бында, торғаны ожмах инде, әйтерһең дә, үҙеңдең йортоңа килеп инәһең, – тине ул. – Беҙ бөтәбеҙ ҙә Радий Хәбировтан уңдыҡ, атайҙарса хәстәрлек күргәне өсөн республика етәксеһенә сикһеҙ рәхмәтлебеҙ. Мәҙинә Әхмәтова билдәләүенсә, баш ҡалабыҙ күҙгә күренеп төҙөкләнә, беҙҙәге күркәмлекте, подъездарға икенсе һулыш биреүҙе илебеҙҙең бүтән ҡалаларына ла таратырға кәрәк. Шул мәғлүм ки, 2024 йылда, республикабыҙ буйынса, бөтәһе 39 күп фатирлы йорттарҙағы 119 подъезд ремонтланасаҡ, ә баш ҡалабыҙҙа 24 күп фатирлы йорттағы 77 подъездға "икенсе ғүмер" биреләсәк. Фото: ufacity.info ФЕКЕР Ирина ГОЛОВАНОВА, Башҡортостан торлаҡ-коммуналь-хужалыҡ министры: – Таҙа подъезд, күркәм ихата – быларҙың барыһы ла һәр кемдә яҡшы кәйеф тыуҙыра, Башҡортостанда иһә республика етәкселеге халыҡтың йәшәйешен яҡшыртыу йәһәтенән күп эштәр башҡара.