Спорт һәм физик культура һәр кемгә барып етергә тейеш

16 сентябрҙә Башҡортостан Башлығы Радий Хәбиров Хөкүмәттә уҙғарған оператив кәңәшмәлә спорт һәм физик культура өлкәһендә дәүләт социаль заказын үтәү мәсьәләһе тикшерелде. 2022 йылдан был программа сиктәрендә төрлө спорт төрҙәре, шул иҫәптән йөҙөү, художестволы һәм спорт гимнастикаһы, хоккей, самбо, теннис һәм башҡа дисциплиналар буйынса әҙерлек хеҙмәттәре күрһәтелә. Социаль заказдың тәүге йылында Башҡортостанда спорт менән шөғөлләнеүселәр һаны 15,4 процентҡа артҡан. 2023 йылда был күрһәткестең – тағы ла 13,5 процентҡа, ә быйыл 17,7 процентҡа артыуы күҙәтелә. Программала конкурс нигеҙендә коммерция һәм коммерцияға ҡарамаған спорт ойошмалары ҡатнаша ала, был юғары кимәлдәге хеҙмәттәр күрһәтеүҙе тәьмин итеү мөмкинлеген бирә. Бынан тыш, Башҡортостан федераль проекттарҙа ла әүҙем ҡатнаша. Улар иҫәбендә – дәүләт-шәхси партнерлыҡ шарттарында яңы спорт объекттары төҙөүҙе күҙ уңында тотҡан «Бизнес-спринт» программаһы. Хәтерегеҙгә төшөрәбеҙ: республикала «Бизнес-спринт» программаһы буйынса Өфөлә – «Бал» универсаль спорт комплексы, Нефтекамала – «Амфибия» бассейны һәм уйын залы булған спорт үҙәге, Октябрьскийҙа – йөҙөү бассейны, ә Стәрлетамаҡта «Алға» физкультура-һауыҡтырыу комплексы төҙөлә. Өфөлә ике объект – «Физра-Д» һәм «Физра-Р» физкультура-һауыҡтырыу комплекстары – файҙаланыуға тапшырылды ла инде. Дәүләт социаль заказының мөһим йүнәлештәренең береһе – 60 йәштән өлкәндәрҙе физкультура менән шөғөлләнеүгә йәлеп итеү. Был йүнәлеш «Хеҙмәткә һәм оборонаға әҙер» комплексы нормативтарын үтәгән өсөн 10 000 һумлыҡ сертификаттар тапшырыуҙы күҙ уңында тота. Спорт секцияларына бушлай йөрөү мөмкинлеген биргән бындай сертификаттарға 2023 йылда өлкән йәштәгеләрҙән 1 411 кеше эйә булған. – Башҡортостандың өлкән быуын вәкилдәре араһында «Хеҙмәткә һәм оборонаға әҙер» комплексы нормативтарын үтәүгә ҡыҙыҡһыныу арта бара. 2023 йылда тест тапшырыуҙа 5 меңдән ашыу кеше ҡатнашты, был 2022 йыл менән сағыштырғанда 4,5 тапҡырға күберәк, – тине республиканың спорт министры вазифаһын башҡарыусы Руслан Хәбибов. – Сертификаттар оло йәштәгеләргә бассейндарға, тренажер залдарына һәм башҡа секцияларға бушлай йөрөү мөмкинлеген бирә, был уларға, үҙ сиратында, физик әүҙемлекте һаҡларға ярҙам итә. 2024 йылда планда – сертификаттар менән 60 йәштән өлкән 2 меңдән ашыу кешене тәьмин итеү. Республикала шулай уҡ, нормативтарҙы үтәү йомғаҡтарына ярашлы, һаулыҡ мөмкинлектәре сикләнгән кешеләргә спорт менән шөғөлләнеү хаҡын компенсациялау буйынса программаны 6 йәштән 18 йәшкә тиклемгеләргә лә таратырға ҡарар ителде. 2024 йылда был категорияға ҡараған 1 мең самаһы кешегә сертификат тапшырыла. Руслан Хәбибов социаль заказға инвалидлыҡ алған махсус хәрби операция ветерандарына физкультура-һауыҡтырыу хеҙмәттәре күрһәтеүҙе лә индерергә тәҡдим итте. Башҡортостан Башлығы Радий Хәбиров был башланғысты хупланы һәм махсус хәрби операцияла ҡатнашыусыларҙы спортҡа йәлеп итеүҙең мөһимлеген һыҙыҡ өҫтөнә алды. – Егеттәрҙең үҙ-үҙенә бикләнмәүе, йәмғиәттең әүҙем ағзалары булыуы мөһим. Бындай һәр ир-егетте спорт менән шөғөлләнеүгә йәлеп итергә кәрәк, – тип билдәләне Радий Хәбиров. Фото: Башҡортостан Башлығы сайты.