Илеш районына командировка барышында Үрмәт мәктәбендә булырға тура килде. Мәктәп уҡыусылары беҙҙе арҙаҡлы яҡташтары, талантлы шағир Ринат Хәйриҙең шиғырҙары менән ҡаршы алды. Тиҙҙән, 2025 йылдың 19 ғинуарында, Ринат Хәйригә 75 йәш тулған булыр ине. Әлеге ваҡытта Үрмәт мәктәбе уҡыусылары ошо иҫтәлекле көнгә, уны лайыҡлы итеп үткәреүгә әҙерләнә икән. Әминә Әхмәҙиева, Физәлиә Ситдиҡова, Алина Ғилметдинова, Илдар Шәйҙуллин, Нурия Кәримова һәм Рәлиә Йәнгирова шағирҙың балалар өсөн яҙылған шиғырҙарын матур итеп һөйләп ишеттерҙе. Улар был сығышты башҡорт теле һәм әҙәбиәте уҡытыусыһы Альмира Фәнис ҡыҙы Ғимазова етәкселегендә әҙерләгән. Ә инде 6-сы класс уҡыусыһы Әдинә Иномова беҙгә башҡорт халыҡ йыры “Сыңрау торна”ны бүләк итте. Осрашыуҙа Илеш районының мәғариф идаралығы хеҙмәткәре Зинфира Минһажева менән ветеран уҡытыусы Ғәлимә Ғәлиева ла ҡатнашты. Уҡытыусылар һәм балалар менән аралашҡандан һуң мәктәп менән яҡындан таныштыҡ. 2009 йылда элекке колхоз идараһы бинаһына реконструкция яһалып, Үрмәт мәктәбе яңы урынға күскән. 2020 йылдан был мәктәп Рсай дөйөм белем биреү мәктәбенең филиалы һанала. Бөгөн бында 41 уҡыусы тырышып белем ала, уларға үҙ эшен яратҡан ун тәжрибәле уҡытыусы белем һәм тәрбиә бирә. – Уҡыусыларыбыҙ төрлө кимәлдәге конкурс, олимпиадаларҙа ҡатнашып, еңеүҙәр яулай. Спорт бәйгеләрендә лә һынатмайҙар. Башҡортостан Республикаһының мәктәп системаһын модернизациялау федераль программаһын тормошҡа ашырыуға ярашлы мәктәптең спорт залына капиталь ремонт яһалды. Шулай уҡ “Урындағы башланғыстарға булышлыҡ итеү” программаһы нигеҙендә мәктәп автобусына йылы гараж төҙөү эше башланды, – тип эшмәкәрлектәре менән таныштырҙы директор Азат Ғәлим улы Ғимазов. Үрмәт мәктәбендә уҡыусылар ҙа, уҡытыусылар коллективы ла күп һанлы тип әйтеп булмай, әммә улар бер ғаилә кеүек берҙәм булып тырышып эшләй, яңынан-яңы үрҙәргә ынтыла. Алда телгә алынған сығыштар, Ринат Хәйриҙең юбилейына арналған әҙерлек тә – ошоға дәлил. Балалар, уҡытыусылар менән аралашҡандан һуң Үрмәттә тыуып үҫкән шағир Ринат Хәйриҙең ҡәберенә зыярат ҡылып, Илеш талантын иҫкә алдыҡ, сөнки сентябрь башында, йәғни 5-ендә – уның вафат булған көнө. Шағирҙың ҡәберенә сәскәләр һалдыҡ, уны бер минут тын ҡалып, иҫкә алдыҡ. Автор фотолары һәм видеолары.