Хәҙер ауылдарҙа ла шәп тренерҙар күп

Быйылғы йәй спорт сараларына бик бай. Улар – БРИКС илдәре спорт уйындары, Европаның футбол буйынса чемпионаты, Париждағы Паралимпия уйындары һәм башҡалар. Һөнәри спорттан тыш, күптәр физкультура менән шөғөлләнә. Быға тиклем яҡшы спорт тренерҙары “йондоҙ”ҙарҙы, нигеҙҙә, спорт инфраструктураһы, буласаҡ чемпиондар күп булған ҡалаларҙа тәрбиәләнә ине. Әммә элек-электән спорт яратҡан, иҫ киткес һәләтле, көслө ихтыярлы, маҡсатлы ҡыҙҙар һәм егеттәр ауылдарҙа ла булған. Тик бассейн, тренажер залдары, шул иҫәптән яҡшы остаздар ҙа етмәгән. Башҡортостан Башлығы Радий Хәбировтың башланғысы менән эшләнгән һәм тормошҡа ашырыла башлаған “Ауыл тренеры” программаһының төп пункттарының береһе 2020 йылдан алып эшләп килгән “Ауыл тренеры” программаһының төп пункты - Башҡортостан Республикаһы биләмәһендә урынлашҡан ауыл тораҡ пункттарында, ҡасабаларында, йәиһә 100 меңгә тиклем кеше йәшәгән бәләкәй ҡалаларҙа спортсыларҙы әҙерләгән тренерҙарға бер тапҡыр бирелә торған компенсация түләүҙәре биреү. Хәҙер түләүҙәр бер белгескә 1 миллион һум тәшкил итә һәм уға торлаҡ (йорт йәки фатир); торлаҡ йорт төҙөү өсөн ер участкаһы һатып алырға; йорт төҙөргә; ипотека торлаҡ кредиты буйынса йөкләмәләрҙе ҡапларға, шәхси автотранспорт һатып алырға; белем биреү программалары буйынса уҡытыу үтергә мөмкин. “Республика райондарында спорт үҫешенә ҙур иғтибар бүләбеҙ. Был бик мөһим. Тап унда бөйөк атлеттар тыуа”, – тип белдергәйне Башҡортостан Башлығы Радий Хәбиров быйыл үткәрелгән Башҡортостан Башлығы ҡарамағындағы Физик культура һәм спорт үҫеше мәсьәләләре буйынса совет кәңәшмәһендә. Проект ғәмәлдә булған дүрт йыл эсендә Башҡортостан Республикаһы райондарында эшләгән 176 тренер түләү алған. Тренерҙарға түләүҙәрҙең дөйөм суммаһы 134,8 миллион һум тәшкил итә. 2024 йылда уҡ республиканың 11 муниципаль район һәм ҡалаһынан 21 тренер-уҡытыусыға “Ауыл тренеры” сертификаты буйынса түләүҙәр бирелгән. Ҡырмыҫҡалы районында был программаға лайыҡлы тренерҙар бар, киләсәктә улар ҙа үҙҙәрен күрһәтер, тип ышанабыҙ. Мәҫәлән, Ҡабаҡ ауылынан панкратион буйынса өлкән тренер Денис Хәсәнов шәхси өлгөһө менән йәштәрҙе сәләмәт йәшәү рәүеше алып барыуға илһамландыра. Ул ғүмере буйы спорт менән шөғөлләнә һәм район, республика, хатта бөтә Рәсәй кимәлендәге ярыштарҙа йәш спортсылар командаһы менән ҡатнаша. Ул районда панкратион уйынын тергеҙеп был традицион спорт төрөн юғары кимәлгә күтәрҙе. Проект ярҙамында республиканың ауыл биләмәләренең кадрҙар мәсьәләһе системалы хәл ителә, шулай уҡ балалар-үҫмерҙәр спорты ла үҫешә. Руслан ХӘЙРЕТДИНОВ, Ҡырмыҫҡалы районы хакимиәтенең йәштәр сәйәсәте, физик культура һәм спорт бүлеге етәксеһе: - “Ауыл тренеры” программаһы буйынса беҙҙең районда әлеге ваҡытта ярҙам алғандары юҡ. Әммә бындай программалар тренерҙар өсөн бик кәрәк, бигерәк тә йәш быуынға. Ярҙам алған тренерҙар тағы ла дәртләнеп эшләрҙәр ине, улар эшләһә, беҙҙең спортсылар тағы ла ҙурыраҡ һөҙөмтәләргә өлгәшә аласаҡ. Айрат Нурмөхәмәтов фотолары.