Ауылдаштарына ҙур бүләк яһаған

Белеүебеҙсә, “Атайсал” проекты тураһында тәҡдимде Башҡортостан Башлығы Радий Хәбиров 2019 йылдың ноябрендә тыуған төйәгенә – Ишембай районының Һайран ауылына эш сәфәре барышында белдергәйне. Артабан инде ойоштороу комитеты, проекттың положениеһы, махсус сайт булдырылып, эш башланды. Шул мәлдән бөгөнгәсә ошо проектҡа йөҙәрләгән, меңәрләгән кеше ҡушылды. Улай ғына ла түгел, бөгөн “Атайсал” проекты менән илдең башҡа төбәктәре лә ҡыҙыҡһына, үҙҙәрендә тормошҡа ашырыу теләген белдерә. Бөгөн “Атайсал” – республиканың барлыҡ төбәктәрендә киң ҡолас алған проект. Изге йөрәкле, ярҙамсыл, йәнтөйәген яратҡан кешеләр социаль әһәмиәтле объекттар төҙөүгә, булғандарын ремонтлауға, мәктәптәргә, балалар баҡсаларына, мәҙәниәт йорттарына, ауыл китапханаларына ярҙам итеүгә ғәйәт ҙур иғтибар бүлә. Хәйбулла районының Йәнтеш ауылында тантаналы шарттарҙа яңы стела һәм арт-объект асылды. Былай ҙа хозур тәбиғәте менән алдырған төйәккә яңы объекттар тағы ла сағыу биҙәк өҫтәй. Ауыл йәштәре ошондай иҫтәлекле урындар булдырыу хаҡында күптән хыяллана. Быйыл улар эскиз төҙөп, стела һәм арт-объектты ҡуйыуға аҡса ла таба. Төп инициатор ошо ауылда тыуып үҫкән Азамат Торомтаев була. Ул был изге эшен “Атайсал—кесе тыуған ер” төбәк проекты аша тормошҡа ашыра. 2021 йылда республика Башлығы Радий Хәбировтың тәҡдименә ярашлы башланғыс алған проекттың киң танылыу алыуына берәү ҙә шикләнмәгәндер. Ысынлап та, бөгөн был проект күптәрҙе берләштерҙе, тыуған еренә һәм атайсалына ҡарата иғтибарлы булырға саҡырҙы, ҡайтанан үҙ еренең ул һәм ҡыҙҙарын ата нигеҙенә, тәүге тәпәй баҫҡан, ҡанат нығытҡан ауылдарына алып ҡайтты. “Атайсал” проектында ҡатнашырға теләк белдереүселәрҙең күбеһе тап кесе Ватанына ярҙам ҡулы һуҙырға ашыҡты. Азамат Сәит улы әйтеүенсә, ауылға стела һәм арт-объект ҡуйыу идеяһы менән 10 йыл элек яна башлай. Әммә тыуған ауылына яҡын йәшәгәндә форсаты сыҡмай тора. Ете йыл элек ул ғаиләһе менән Ханты-Манси округына йәшәргә күсә. Ҡатыны Луара, ҡыҙҙары Фатима, Сәлимә менән йыл һайын Йәнтештә йәшәгән ата-әсәһе янына ял итергә ҡайталар. Быйыл ул ауылдаштар чатына ошо изге тәләге хаҡында белгертеп яҙа. Ауылдаштары уның башланғысын хуплай һәм тиҙ арала 200 меңдән ашыу аҡса йыялар. Буласаҡ объекттарҙың макетын Сибай һәм Баймаҡ ҡалаларының реклама агентлыҡтары хеҙмәткәрҙәре эшләп бирә. -Бөтәһе алты төрлө макет бар ине. Уларҙың һәр ҡайһыһы өсөн ауылдаштарым тауыш бирҙе. Иң күп тауыш йыйғанын эшләттек тә инде. Хәҙер ауылға ингән урында - Тәкәл тауы битләүендә “Мин яратам Йәнтешемде” стелаһы ҡаршы ала. Унда шулай уҡ ауылдашыбыҙ, башҡорт теле һәм әҙәбиәте уҡытыусыһы Хәниф Сәфәровтың йәнтөйәккә арнап сығарған шиғырынан юлдар ҙа яҙылған. “Йөрәгемдә Йәнтешем” арт-объектын иһә автобус туҡталышы янына урынлаштырҙыҡ, - ти Азамат Сәит улы. -Әлеге көндә Йәштештә йәшәүселәргә, унан ситтә тороусыларға ярҙамдары өсөн ҙур рәхмәт белдерәм. Ысынлап та, көс берҙәмлектә. Булдыҡлы ир-егеттең был эшен ауылдаштары ла хуплай. - Һаҡмар буйындағы иң гүзәл ауылдарҙың береһе беҙҙең Йәнтеш. Бик матур урында йәшәйбеҙ. Ауылдаштарыбыҙ эшсән, намыҫсан булыуҙары менән башҡаларҙан айырыла. Тыуған төйәгем тип янып йәшәгән йәштәребеҙ булыуы һөйөндөрә. Азамат Сәит улы - шундайҙарҙың береһе. Алыҫ тарафтарҙа йәшәһә лә, йылына ике тапҡыр мотлаҡ тыуған ауылына ата-әсәһе янына ҡайта. Матур ғаилә башлығы булыуы менән дә башҡаларға өлгө. Рәхмәт тырыш яҡташыбыҙға! Рәхмәт ауылдаштарға! — тине Йәнтеш ауылы мәҙәниәт йорто етәксеһе Лена Фуат ҡыҙы Ултыраҡова, стела менән арт-объектты асыу тантанаһында. Фото: Лена Ултыраҡова.