Тәүлек эсендә 18 миллион һумдан ашыу аҡсаны сәлдергәндәр!

Ҡаланың медицина учреждениеларының береһендә эшләгән 64 йәшлек табип-рентгенолог Өфө ҡалаһы буйынса 6-сы полиция бүлегенә мөрәжәғәт иткән. Баҡтиһәң, зыян күреүсегә баш табиптан хоҡуҡ һаҡлау органдарына ярҙам күрһәтеүҙе һорап шылтыратыу килгән. Һөҙөмтәлә уға билдәһеҙ номерҙан берәү шылтыратып, үҙен ”көс структуралары хеҙмәткәре” тип таныштыра һәм шәхси мәғлүмәттәрҙең башҡаларҙың ҡулына эләгеүе тураһында хәбәр итә. Ялған хеҙмәткәр, урлауға юл ҡуймаҫ өсөн, Өфөлә йәшәүсене кредит алырға һәм аҡсаны “хәүефһеҙ иҫәп”кә күсерергә күндерә. Табип аферисттарҙың күрһәтмәләрен үтәй һәм уларҙың иҫәбенә 4,5 миллион һумдан ашыу шәхси аҡсаһын, өҫтәүенә 500 мең һум кредит алып күсерә. Рәсәй Эске эштәр министрлығының Бөрө районы буйынса бүлегенә 77 йәшлек ҡатын мөрәжәғәт иткән. Пенсионерға “банк хеҙмәткәре” шылтыратып, уның иҫәбендә шикле эшмәкәрлек күҙәтелеүе тураһында хәбәр итә. Шылтыратыусы әлеге ваҡытта хоҡуҡ һаҡлау органдары енәйәтсене эҙләүен һәм уның кемлеген “асыҡлауҙа” пенсионерҙан ярҙам һорай. Шарттар менән ризалашҡас, ҡатын өс миллион һум күләмендә шәхси аҡсаһын туплап, килгән курьерға тапшыра. Туймазы районында йәшәүсе 51 йәшлек ир урындағы полиция бүлегенә мутлашыу тураһында ғариза менән мөрәжәғәт иткән. Зыян күреүсегә мессенджерҙарҙың береһендә билдәһеҙ кешенән шылтыратыу килә. Әңгәмәсе үҙен “Элемтә компанияһы хеҙмәткәре” тип таныштыра һәм сим-картаның ғәмәлдә булыу ваҡыты тамамланыуы тураһында хәбәр итә. Уны ситтән тороп та оҙайтып була, ти ялған белгес: бының өсөн телефонға килгән смс-кодтарҙы хәбәр итеү ҙә етә. Бер аҙҙан зыян күреүсегә банктан шәхси мәғлүмәттәрҙең ситкә китеүе тураһында шылтыратыуҙар килә башлай. Билдәһеҙ кешеләрҙең кредит алырға маташыуын булдырмаҫ өсөн, Туймазы районында йәшәүсе мутлашыусылар кәңәше буйынса 1,5 миллион һумдан ашыу суммаға кредит рәсмиләштерә һәм уларҙы “хәүефһеҙ иҫәп”кә күсерә. БР буйынса Эске эштәр министрлығы иҫкәртә: таныш булмаған кешеләргә аҡса күсермәгеҙ. Әгәр банк йәки хоҡуҡ һаҡлау органдары хеҙмәткәренән шылтыратыу килһә, трубканы һалығыҙ. Иҫегеҙҙә тотоғоҙ, мутлашыусылар ялған номерҙарҙы ла ҡуллана ала. Социаль селтәрҙәрҙә һәм мессенджерҙарҙа аралашҡанда һаҡ булығыҙ. Таныштарығыҙҙан, коллегаларығыҙҙан һәм туғандарығыҙҙан шикле хәбәрҙәр алһағыҙ, уларҙың шәхси номеры буйынса бәйләнешкә инегеҙ. Шикле сайттарҙа ғаризалар тултырмағыҙ һәм мәғлүмәттәрегеҙҙе ҡалдырмағыҙ. Фото: МВД-ның матбуғат хеҙмәте.