2019-2024 йылдарҙа Башҡортостандың мәктәп автопарктарын 700 автобус тулыландырҙы. Уларҙың 253-ө - төбәк бюджеты иҫәбенә, 447-һе федераль ярҙамға һатып алынған. Август кәңәшмәһе көнөндә тағы 17 автобус республиканың 15 муниципалитетына юлланды. Уларҙы Башҡортостан Башлығы Радий Хәбиров тапшырҙы һәм имен юлдар теләне. – 1 сентябрь алдынан беҙ мәктәп автобустарын тапшырыуыбыҙға шатбыҙ. 52 меңдән ашыу баланың уҡыу көнө мәктәп автобусынан башлана. Иң мөһиме, юлдарҙа хәүефһеҙлек булырға тейеш. Ә хәүефһеҙлек – яңы, яҡшы автобустар һәм профессиональ водителдәр, – тине Радий Хәбиров. Башҡортостанда мәктәп уҡыусыларын 1523 автобус уҡыған урындарына алып бара. Улар 2638 тораҡ пункттан 52 206 баланы йөрөтә. Әбйәлил районында уҡыусыларҙы йөрөтөүҙә 37 автобус файҙаланыла. Автобустар ГОСТ-ҡа ярашлы йыһазландырылған. 65 тораҡ пункттан ике меңдән ашыу баланы йөрөтөү күҙәтелә. Быйыл Амангилде ауылы мәктәбе өсөн яңы автобус һатып алынған. Яңы автобуста күтәрелмәле (механик) баҫҡыс, ултырғыстарҙың һәр рәтендә “Туҡталыуҙы талап итеү” төймәһе, салон эсен күҙәтеү өсөн артҡы сфера көҙгөһө, тауыш көсәйтеүсе ҡоролма, инеү-сығыу зонаһын яҡтыртыу, ЭРА-ГЛОНАСС системаһы һәм башҡалар бар. Пассажир ултырғыстары дүрт нөктәле хәүефһеҙлек ҡайыштары һәм махсус таянсыҡ менән йыһазландырылған. Фото: utv.ru