Найти тему
Башҡортостан гәзите

Өфөлә «Рәсәй - спорт державаһы» халыҡ-ара форумы үтә

10 сентябрҙә республика менән идара итеү үҙәгендә Башҡортостан Башлығы Радий Хәбиров 2024 йылдың 17-19 октябрендә Өфөлә үтәсәк «Рәсәй - спорт державаһы» халыҡ-ара спорт форумына әҙерлек буйынса төбәк ойоштороу комитеты ултырышын үткәрҙе. Хәтерегеҙгә төшөрәбеҙ, илдең төп спорт форумы Башҡортостанда Рәсәй Президенты Владимир Путиндың ҡарары буйынса уҙа. Төп саралар 2024 йылдың 31 авгусында Өфөнөң 450 йыллығы уңайынан асылған Көрәш һарайында уҙғарыла, тип билдәләне республика башлығы Радий Хәбиров. Форумда йәмғеһе 100-ҙән ашыу сит ил дәүләттәре вәкилдәре ҡатнашырға ниәтләй. - Төп бурыстар иҫәбендә - Фехтование үҙәгенең һәм ишкәкле слалом өсөн ҡоролмалар комплексының тулыһынса әҙерлеген тәьмин итеү. Уларҙы тантаналы рәүештә форум сиктәрендә асырға һәм бында тәүге халыҡ-ара ярыштар үткәрергә ниәтләйбеҙ, - тип һыҙыҡ өҫтөнә алды Радий Хәбиров. Кәңәшмәлә ҡатнашыусылар шулай уҡ ҡайһы бер ойоштороу мәсьәләләрен тикшерҙе. Улар иҫәбендә - ҡунаҡтарҙы урынлаштырыу, уларҙы транспорт һәм медицина хеҙмәтләндереүе, саралар барышында йәмәғәт тәртибен һәм хәүефһеҙлеген тәьмин итеү. Форумдың мәҙәни программаһын тикшереп, Радий Хәбиров халыҡ-ара делегацияларға күрһәтеү өсөн Өфө театрҙары репертуарына сағыу постановкалар индереү кәрәклеген билдәләне. Бынан тыш, ҡунаҡтарға баш ҡала музейҙары ла үҙҙәренең иң яҡшы экспозицияларын тәҡдим итәсәк. Фото: БР Башлығы сайтынан