Һыу – йәшәү сығанағы

Башҡортостан Рәсәйҙең бүтән субъекттарына һәр йәһәттән дә өлгө һанала. Төҙөлөш тармағы тиһеңме, агросәнәғәт комплексы булһынмы, һаулыҡ һаҡлау йүнәлешеме - республикабыҙҙа бөтә яҡлап та алға китеш күҙәтелә. Мәҫәлән, республикабыҙҙағы һыуһаҡлағыстар бөгөн үҙ эшен теүәл башҡара, сөнки Башҡортостан Башлығы Радий Хәбиров был мәсьәләгә һәр саҡ етди иғтибар бүлде. Әйткәндәй, республикабыҙ етәксеһе Радий Хәбиров халыҡтың йәшәйешенә уңайлыҡтар тыуҙырыуға һәр ваҡыт етди ҡараны, әле лә ошо йүнәлештә уй-маҡсаттарҙы бойомға ашыра. Ысынлап та, Башҡортостанда төрлө йүнәлештә уй-маҡсаттар уңышлы тормошҡа ашырыла. Планлы эштәрҙең барыһы ла кешеләргә йәшәйештә еңеллек тыуҙырыуға туранан-тура бәйле. Элек, дөрөҫөрәге, 2018 йылға ҡәҙәр һыуһаҡлағыстар ҡыйралыу сигендә ине, емерелеү хәленә еткерелгәйне. Ә инде Радий Хәбиров Башҡортостан Башлығы вазифаһында эшләй башлағас та был юҫыҡта ыңғай яҡҡа үҙгәрештәр күҙәтелде, республика етәкселеге уларҙы тулыһынса тәртипкә килтереүгә тотондо. – Халыҡ мәнфәғәтен хәстәрләү – өҫтөнлөклө йүнәлештәрҙең береһе, иң мөһиме, һәр кем һәр яҡлап та уңайлыҡтары булған шарттарҙа көн итһен, – тине Радий Хәбиров. Башҡортостанда 2019 йылдан алып, кешеләрҙең тормошона еңеллек өҫтәү маҡсатында, төрлө программалар уңышлы бойомға ашырыла башланы. Ауылдарҙы төҙөкләндереү булһынмы, ял урындарын күркәмләндереү тиһеңме, һыуһаҡлағыстарға икенсе һулыш биреүме - матур ҙа, кәрәкле лә ошо башланғыстарҙың бөтәһе лә Башҡортостан Башлығының оло хәстәрлеге. Мәҫәлән, Хәйбулла районындағы ике һыуһаҡлағысҡа туҡталғы килә, улар Көньяҡ Уралда урынлашҡан. Беренсеһе – Яңы Украинка ауылы эргәһендәге Киҙәташ йылғаһында урынлашҡан, гидротехник ҡоролма сәғәт шикелле эшләй. Ошо һыуһаҡлағысҡа 1,9 миллион һумлыҡ капиталь ремонт эштәре (2019 йыл) үткәрелгән. Ысынлап та, ошо эштәрҙе атҡарғандан һуң, тәбиғәткә әйтеп аңлата алмаҫлыҡ файҙа килтерелгән. Уның эргә-тирәһенең йәшеллеккә күмелеүе, һыу запасы булдырылыуы, унда ҡыр ҡоштарының ҡайтыуы шуға асыҡ миҫал. Әнүрә Кәримова һөйләүенсә, Киҙәташ йылғаһы буйы күҙгә күренеп күркәмләнгән һәм таҙарған, был урындан хатта ҡайтҡы ла килмәй. Икенсе һыуһаҡлағыс тураһында шуны уҡ әйтергә була. Абрек Баймырҙиндың һүҙҙәренә ҡарағанда, Иҫәнгилде ауылы йылдан-йыл төҙөкләнә һәм күркәмләнә, уның тәбиғәте лә хозурлана бара. – Туләбай йылғаһынан йыраҡ булмаған ерҙә һыуһаҡлағыс бар, халыҡтың шатланғанын күрһәгеҙ икән, – тине ул. – Ситтә йәшәһәм дә, был яҡтарҙа йыш булам. Тәбиғәтте һаҡлауға һәм ҡурсалауға тейешле иғтибар бүлгәне өсөн Радий Фәрит улына рәхмәтебеҙ сикһеҙ. Әйткәндәй, Иҫәнгилде ауылындағы Түләбай һыуһаҡлағысында гидротехник ҡоролма бынан биш йыл элек төҙөлгән, уға 9,48 миллион һум аҡса йүнәлтелгән. Башҡортостанда республика етәкселегенең ярҙамы менән гидротехник ҡоролмаларға һәр саҡ капиталь ремонт уҙғарыла, был, һүҙ ҙә юҡ, экологияны яҡшыртыуға бәйле. Фото dzen.ru ФЕКЕР Нияз ФАЗЫЛОВ, Башҡортостандың тәбиғәттән файҙаланыу һәм экология министры: – Йыл һайын һыуһаҡлағыстарҙа ташҡынға ҡаршы күнекмәләр үтә. Быйыл һыу бүтән йылдарға ҡарағанда күп булды. Уның ҡарауы, бөтә һыуһаҡлағыстар ҙа планға ярашлы эшләне. Һыуһаҡлағыстарҙың тотороҡло эшләүе алдан хәстәрлек күреүгә туранан-тура бәйле.