Рәсәйҙә Ғаилә йылы уңайынан гәзит уҡыусыларыбыҙҙы ғаилә ҡиммәттәрен ҡәҙерләп һаҡлаған һәм арттырған Мәсетле районы халҡы менән таныштырыуҙы дауам итәбеҙ. Улар хатта иң ауыр тормош шарттарында ла тәрән мөхәббәт, тоғролоҡ, бер-береһенә хөрмәт һәм ярҙам өлгөһө күрһәтә.
Әләгәҙ ауылында йәшәүсе Фиреда һәм Фуат Солтановтар – районыбыҙҙың күп балалы ғаиләләренең береһе. Улар дүрт бала тәрбиәләй. 11 йәшлек Айгөл әсәһенең төп ярҙамсыһы булып тора. Өлкән улдары Айнур икенсе класты тамамлаған, атаһы эштә саҡта өйҙә хужалыҡ эштәрендә ярҙам итә. Тағы ике улдары Айбулат менән Салауат – әсәй тәрбиәһендә.
Фиреда Сергеевна Урта Аҡа ауылында тыуып үҫкән. Мәктәпте тамамлағандан һуң Дыуан колледжында ветеринария фельдшеры һөнәренә эйә була. 2019 йылда Әләгәҙ ауыл советында ер мәсьәләләре буйынса белгес булып эшләй башлай. Әле бала ҡарау буйынса декрет ялында.
– Беҙ ирем менән һәр саҡ ғаиләбеҙҙең ҙур булыуын теләнек һәм бына дүрт балаға ғүмер бүләк иттек. Ата-әсә булараҡ, беҙ уларҙың намыҫлы булып үҫеүҙәрен, бәхетле булыуҙарын һәм тормошта үҙ урындарын табыуҙарын теләйбеҙ. Бының өсөн мөмкин булғандың барыһын да эшләйәсәкбеҙ, – ти Фиреда Сергеевна. – Ә йәштәргә атай- әсәй булыуҙан ҡурҡмауҙарын теләр инем: һәр бала үҙ бәхете менән донъяға килә. Бигерәк тә хәҙер дәүләт күп балалы ғаиләләргә әүҙем ярҙам итә.
Ғаилә башлығы Фуат Зөлфәз улы Аҙанғол ауылында тыуған һәм үҫкән. Тайыш мәктәбен тамамлағандан һуң, тормош иптәше кеүек, Дыуан аграр колледжында ауыл хужалығы механигына уҡый. Һуңынан эске ғәскәрҙәрҙә хәрби хеҙмәт үтә. Демобилизациянан һуң Себер тарафтарында, Коми Республикаһында, водитель булып эшләй. 2018 – 2021 йылдарҙа Мәсетле юл ремонт-төҙөлөш идаралығында хеҙмәт юлын дауам итә, “КамАЗ” водителе була. Хәҙер Фуат Зөлфәз улы – Свердловск өлкәһендә экскаватор машинисы.
– Ирем менән Дыуан техникумында уҡығанда таныштыҡ, бер районда йәшәһәк тә, ниңәлер яҙмыш беҙҙе быға тиклем осраштырмаған. Биш йылдан һуң яҙмыштарыбыҙҙы бәйләргә булдыҡ һәм 2013 йылда туй үткәрҙек, – тип һөйләй Солтановтар.
Ата-әсәләр ғаиләлә бала тыуыуға яуаплы ҡарай. Дәүләт һәм Башҡортостан Республикаһы һығылмалы ярҙам саралары тәҡдим итә. Ишле ғаилә бала тыуғандан алып ул балиғ булғанға тиклем һәр этапта ярҙамға иҫәп тота ала. Дәүләт һәм йәмәғәт ойошмалары балалы ғаиләләрҙең йәшәүен тейешле кимәлдә тәьмин итеү өсөн төрлө формалар тәҡдим итә. Һүҙ төрлө льготалар һәм пособиелар рәүешендә матди ярҙам, шулай уҡ йәшәү өсөн мөһим хеҙмәттәр һәм тауарҙар күрһәтеү юлы менән булышлыҡ итеү хаҡында бара.
Солтановтар ҙа ошондай ярҙам сараларының береһе менән файҙаланған: дүрт йыл элек әсәлек капиталы аҡсаһына Әләгәҙҙә өй һатып алғандар. 2022 йылдан улар, күп балалы ғаилә булараҡ, ер участкаһы алыуға сиратта тора.
Бынан тыш, Солтановтар социаль контракт (социаль контракт нигеҙендә адреслы социаль ярҙам) төҙөгән. Бирелгән аҡсаға һыйыр һатып алғандар.
– Беҙҙең үҙ һыйырыбыҙ бар ине, әммә балаларға универсаль пособие юллағанда, күп балалы булғанлыҡтан, шәхси ярҙамсы хужалыҡ алып барыуға социаль контракт нигеҙендә адреслы социаль ярҙам алырға хоҡуҡлыһығыҙ, тинеләр. Тормош иптәшем менән бергә тағы бер һыйыр аҫрарға хәл иттек. Кәрәкле документтарҙы тултырып, субсидия алдыҡ. Һыйырҙарҙан тыш, быҙау һәм ҡураны тәртипкә килтереү өсөн кәрәкле материалдар, шулай уҡ иген фуражы һәм бесән һатып алдыҡ, – ти ир менән ҡатын.
#ғаиләйылы #ҡоролтай #мәсетлеләр