Белеүебеҙсә, “Атайсал” проекты тураһында тәҡдимде Башҡортостан Башлығы Радий Хәбиров 2019 йылдың ноябрендә тыуған төйәгенә – Ишембай районының Һайран ауылына эш сәфәре барышында белдергәйне. Артабан инде ойоштороу комитеты, проекттың положениеһы, махсус сайт булдырылып, эш башланды. Шул мәлдән бөгөнгәсә ошо проектҡа йөҙәрләгән, меңәрләгән кеше ҡушылды. Улай ғына ла түгел, бөгөн “Атайсал” проекты менән илдең башҡа төбәктәре лә ҡыҙыҡһына, үҙҙәрендә тормошҡа ашырыу теләген белдерә. Бөгөн “Атайсал” – республиканың барлыҡ төбәктәрендә киң ҡолас алған проект. Изге йөрәкле, ярҙамсыл, йәнтөйәген яратҡан кешеләр социаль әһәмиәтле объекттар төҙөүгә, булғандарын ремонтлауға, мәктәптәргә, балалар баҡсаларына, мәҙәниәт йорттарына, ауыл китапханаларына ярҙам итеүгә ғәйәт ҙур иғтибар бүлә. Хәйбулла районы Ивановка ауылында “Атайсал” проекты сиктәрендә арт-объект асылған. Уны булдырыуға ауыл халҡы ҙур көс һалған. Проектты эшләү инициативаһы менән Дим Ильясов яҡташтарына мөрәжәғәт итә. Ауылдаштары хуплап, күтәрмәләп ала һәм ҡыҫҡа ғына ваҡытта кәрәкле сумма йыйыла. Шулай уҡ тыуған ауылының бөгөнгөһөнә битараф ҡарамаусылар тырышлығы менән стела ла яңыртыла. Ауыл биләмәһе хакимиәте башлығы Елизавета Абдуллина әйтеүенсә, әлеге проектты тормошҡа ашырыу өсөн 348 000 һум аҡса сарыф ителгән. 2021 йылда республика Башлығы Радий Хәбировтың тәҡдименә ярашлы башланғыс алған проекттың киң танылыу алыуына берәү ҙә шикләнмәгәндер. Ысынлап та, бөгөн был проект күптәрҙе берләштерҙе, тыуған еренә һәм атайсалына ҡарата иғтибарлы булырға саҡырҙы, ҡайтанан үҙ еренең ул һәм ҡыҙҙарын ата нигеҙенә, тәүге тәпәй баҫҡан, ҡанат нығытҡан ауылдарына алып ҡайтты. “Атайсал” проектында ҡатнашырға теләк белдереүселәрҙең күбеһе тап кесе Ватанына ярҙам ҡулы һуҙырға ашыҡты. Фото һәм сығанаҡ: Ивановка ауыл биләмәһе