Бөгөн, 20 сентябрҙә, Өфө буйлап эшлекле сәфәрендә Башҡортостан Башлығы Радий Хәбиров Зәйнәб Биишева исемендәге “Китап” нәшриәтенең яңы магазинына һуғылды. Ул ошо көндәрҙә асылғайны. Нәшриәт директоры вазифаһын башҡарыусы Эльмира Хәйретдинова быйылғы февраль айына тиклем кибеттең Октябрь проспектындағы бәләкәй генә бинала эшләүе тураһында һөйләне. – Хәҙер уның өсөн Өфөнөң тарихи үҙәгендә урын табылды, был бик мөһим, сөнки “Китап”тың баҫмалары Башҡортостан менән таныштырырға ла ярҙам итә, – тине ул. Яңы магазиндың майҙаны 182,8 квадрат метр тәшкил итә. Унда ике зал – китап һатыу һәм ял-саралар ойоштороу урыны бар. Магазинда "Китап", "Башҡорт энциклопедияһы" нәшриәттәренең продукцияһы, шулай уҡ төрлө телдәрҙә, шул иҫәптән башҡортса, татарса, русса, удмуртса, инглизсә һәм немецса баҫылған милли әҙәбиәт тәҡдим ителә. Шулай уҡ магазинда Рәсәй нәшриәттәрендә сығарылған китаптарҙы һатып алырға мөмкин. Балалар әҫәрҙәренә һәм классик әҙәбиәткә, ижад итеү өсөн тауарҙарға һәм non-fiction, йәғни нәфис булмаған әҙәбиәткә (ингл.теленән тәржемә иткәндә, non-fiction – уйлап сығарылмаған – Р.Ғ.) айырым иғтибар бүленә. Магазинда шулай уҡ Рус география йәмғиәтенең, Рәсәй хәрби-тарихи йәмғиәтенең эксклюзив китаптары ла бар. Бынан тыш, “Китап”та сувенирҙар, шул иҫәптән Өфөнөң 450 йыллығына бағышланғандарҙы, Башҡортостандың символдары яһалған тауарҙарҙы һатып алырға мөмкин. Залдың икенсе өлөшө лекциялар, китаптар менән таныштырыу саралары һәм башҡа мәҙәни ваҡиғаларға тәғәйенләнгән. Ул авторҙар, нәшерселәр өсөн уңайлы. Башҡортостан Башлығы почетлы ҡунаҡтар китабында теләктәрен яҙып ҡалдырҙы, китаптар ҙа һатып алды. – Аҡмулланың төп нәсихәте – “Башҡорттарым, уҡыу кәрәк!” Ундай зирәк аҡыллы кешенең башҡа нәсихәттәре лә бар. Яңынан уҡып сыҡҡым килә, – тине ул. – “Китап” магазинының үҙәктә урынлашыуы бик яҡшы. Ҡала халҡын һәм ҡунаҡтарҙы әйҙәп торған мәҙәни майҙансыҡ булыр, – тигән ышанысын да белдерҙе. Өфө хакимиәте башлығы Ратмир Мәүлиев магазин янына кәштәләр ҡуйырға тәҡдим итте. Был кешеләргә бер-береһе менән китаптар алмашырға уңайлы булыр ине. “Китап”та һатылған баҫмаларҙы нәшриәттең рәсми сайты һәм маркетплейстар аша алдырырға мөмкин. Сығанаҡ: glavarb.ru/rus/press_serv/novosti/183481.html#group-main-20