Балтас районының 1133-сө һайлау участкаһында иҫтәлекле ваҡиға булды: Богдан ауылында 50 йыл татыу ғүмер иткән Зәнфирә һәм Ғәйетхан Вәлиевтарҙы тәбрикләнеләр. Вәлиевтар йәштән үк "Фрунзе" хужалығында хеҙмәт юлын башлай, Ғәйетхан Мөғәллим улы - тракторсы, Зәнфирә Ғаяз ҡыҙы һауынсы булып эшләй. Намыҫлы хеҙмәттәре өсөн Рәхмәт хаттары һәм Почет грамоталары менән бүләкләнгәндәр, Зәнфирә Ғаяз ҡыҙы юғары наградаға - "Башҡортостан Республикаһының атҡаҙанған ауыл хужалығы хеҙмәткәре" исеменә лайыҡ була. Хәҙерге көндә Вәлиевтар хаҡлы ялда. Улар дүрт ҡыҙ тәрбиәләп үҫтергән, 10 ейән-ейәнсәре һәм 5 бүлә-бүләсәре бар. Алтын туйҙарын билдәләгән матур парҙы тантаналы рәүештә 1133-сө һайлау участкаһында ҡотланылар һәм Башҡортостан Республикаһы Башлығының ҡотлауын тапшырҙылар. "Хөрмәтле Ғәйетхан Мөғәллим улы һәм Зәнфирә Ғаяз ҡыҙы! Күркәм ваҡиға айҡанлы ихлас ҡотлауҙарымды ҡабул итегеҙ. 50 йыл бергә йәшәү - һеҙҙең ысын мөхәббәтегеҙҙе, ғаилә йолаларына тоғролоғоғоҙҙо иҫбатлау билдәһе ул", - тип яҙҙы Балтас районы хакимиәте башлығы Илгиз Субушев. Шулай уҡ райондағы участка һайлау комиссиялары ағзалары төрлө сәбәп буйынса һайлау участкаһына килә алмаған һайлаусыларға законға ярашлы үҙ ихтыярын белдереү мөмкинлеге биреп, бинанан ситтә тауыш биреүҙе ойоштора. Был мөмкинлектән Бөйөк Ватан һуғышы ветерандары Әхнәф Мазһаров һәм Абзал Фазлыев та файҙаланып, өйҙә тауыш биргән. Сығанаҡ һәм фотолар: Балтас районы хакимиәтенән.