Өфөлә “Башҡортостан Башлығын һайлау-2024” йәмәғәт матбуғат үҙәгендә эш дауам итә. Унда төбәктең үҙәк һайлау комиссияһынан тауыш биреү барышы, һайлауҙар үткәреү мәсьәләләре буйынса бөтә оператив мәғлүмәт туплана. Сираттағы спикер Һайлауҙы күҙәтеү буйынса йәмәғәт штабының ағзаһы, “Ирекле йәмәғәт күҙәтеүе” порталының “карта” менән эшләү буйынса төркөм координаторы Алексей Елизарьев белдереүенсә, һайлауҙарҙа йәмәғәт күҙәтеүе йылдан-йыл үҫешә, порталға инеп мәғлүмәт алырға мөмкин. Көндөҙгө сәғәт 4-кә 5600-ҙән ашыу мәғлүмәт килгән, уларҙың 3700-ҙән ашыуы эшкәртелгән. – Дөйөм алғанда, һайлау буйынса ыңғай күренеш күҙәтелә, халыҡ ихлас тауыш бирә, төрлө милли кейемдәрҙә, карнавал костюмдарында килә. Хатта 92 йәшлек һайлаусы барып тауыш бирҙе. Бер генә фейк мәғлүмәт теркәлде, – тине Алексей Николаевич. Йәмәғәт матбуғат үҙәге һайлауҙың өс көнөндә лә эшләйәсәк, 6 сентябрҙән иртәнге сәғәт 8-ҙән киске 8-гә тиклем. Ғәҙәттәгесә, был көндәрҙә төрлө брифингтар, шул иҫәптән һайлау кампанияһы барышын күҙәтеү буйынса Йәмәғәт штабы брифингтары һәм республика Башлығын һайлауҙа тауыш биреү, политологтар һәм эксперттар сығыш яһаясаҡ. Ошонда уҡ һайлау комиссияһынан күҙәтеүсе-блогерҙарҙың тура эфирын күрергә, "Рәхмәт-2024" республика акцияһы йомғаҡтарын һәм башҡа файҙалы мәғлүмәтте белергә мөмкин. Иҫегеҙгә төшөрәбеҙ, 6, 7, 8 сентябрҙә Башҡортостанда республика Башлығын, шулай уҡ район һәм ҡала советтары депутаттарын һайлауҙар үтә. Был көндәрҙә 8.00 сәғәттән 20.00 сәғәткә тиклем республиканың ҡала һәм райондарында 3 302 һайлау участкаһы эшләйәсәк. Төбәктә барлығы 218 һайлау кампанияһы – Башҡортостан Башлығын, республика өҫтәмә һәм урындағы үҙидараның вәкәләтле органдарына депутаттар һайлау буйынса 216 кампания ойошторола. Фото: “Башҡортостан Башлығын һайлау-2024” йәмәғәт матбуғат үҙәгенән. #ВыбираемГлаву #Выборы2024 #Башкортостан