Асҡын районының Солтанбәк ауылы халҡы бөтә республика менән Башҡортостан етәксеһен һайлауҙа әүҙем ҡатнаша. Һайлау участкаһында иртәнән байрам мөхите хакимлек итә. “Умырзая” фольклор ансамбле милли костюмдарҙа һайларға килгән. – Күңелле йырҙар, баян моңо совет осоронан уҡ бөтә һайлауҙарҙа халыҡты оҙатып йөрөнө. Бына бөгөн дә тотош коллектив менән һайлауға килдек. Башҡортостан етәксеһен һайлау – мөһим ваҡиға. Ул беҙҙең республиканың, балаларыбыҙ һәм ейәндәребеҙҙең киләсәген билдәләйәсәк, – тине ансамблдең иң өлкән ағзаһы Роза Рәхимйәнова. Ул һәр һайлауҙа ла ҡатнашыуы менән хаҡлы ғорурлана. Мәктәп биләмәһендә көҙгө йәрминкә гөрләп эшләй. Һәр класс сауҙа урынын үҙенсә биҙәргә, һатып алыусыларҙы йәлеп итергә тырышҡан. Көҙгө байлыҡ муллығы менән һоҡландыра. Ә үҙешмәкәр артистар ауылдаштарын музыка, йыр-моң менән ҡыуандырҙы, тип хәбәр итә “Аскинская новь”. Фото: https://vk.com/feed