Баш ҡала халҡы һайлау башланғандың тәүге минуттарынан уҡ әүҙемлек күрһәтә. 386-сы һайлау участкаһы алдында ла иртәндән сиратҡа тороп, һайлау башланғанын көтөп торҙолар. Иң беренсе һайлаусы Гөлназ Хәниф ҡыҙы Әхмәтйәнова булды. Ул 1-се район-ара һалым инспекцияһында эшләй. Һайлау - уның ғаилә тарихының айырылғыһыҙ бер бите булып тора. – Бөгөн иртә менән һайлауға барҙым. Кискә ауылға ҡайтам, шуға ла һайлауҙы ҡалдырмаҫ өсөн алдан тауыш бирҙем, 8 сентябрҙә килеп өлгөрмәүем дә бар. Һайлауға һәр саҡ оло яуаплыҡ менән ҡарайым, бала саҡтан минең өсөн оло ваҡиға булды, сөнки атайым Хәниф Ниғәмәтйән улы Әхмәтйәнов Өфө ҡалаһы Октябрьский районының территориаль комиссия ағзаһы булды. Һәр ваҡыт уның эргәһендә булдым, һайлау комиссияһының нисек эшләгәнен күреп үҫтем. Шуғалыр ҙа Тыуған илгә, Башҡортостанға ҡарата көслө илһөйәрлек тәрбиәһе алдым. Ҡыҙғанысҡа ҡаршы, былтыр Дәүләт Йыйылышы – Ҡоролтай һайлауында ҡатнашҡан, Белорет округы буйынса депутатлыҡҡа кандидат атайым нәҡ ошо мәлдә аварияла һәләк булды. Бөгөн һайлау башланған саҡта Рәсәй Федерацияһы һәм Башҡортостан Республикаһы гимндарын тыңлағанда күҙҙәремдән йәштәр аҡты - оҙаҡ йылдар һайлау эшен ойоштороуҙа ҡатнашҡан атайымды иҫләнем. Һайлау минең тормошомдағы яҡты иҫтәлектәр һалған бер тарих булып тора. Мин һайлауҙы яратам, шуға ла уға ныҡ яуаплы ҡарайым. 18 йәшем тулып, ҡулыма паспорт алғандан бирле был сараны ҡалдырғаным юҡ, – тине Гөлназ Хәниф ҡыҙы. Иҫегеҙгә төшөрәбеҙ, 6, 7, 8 сентябрҙә Башҡортостанда республика Башлығын, шулай уҡ район һәм ҡала советтары депутаттарын һайлауҙар үтә. Был көндәрҙә 8.00 сәғәттән 20.00 сәғәткә тиклем республиканың ҡала һәм райондарында 3 302 һайлау участкаһы эшләйәсәк. Төбәктә барлығы 218 һайлау кампанияһы – Башҡортостан Башлығын, республика Дәүләт Йыйылышы – Ҡоролтай депутатын өҫтәмә һәм урындағы үҙидараның вәкәләтле органдарына депутаттар һайлау буйынса 216 кампания ойошторола. Һайлауға барығыҙ, ҡатнашығыҙ! Автор фотоһы. #ВыбираемГлаву #Выборы2024 #Башкортостан