Башҡорт телендә бюллетендәр ихтыяждан сығып баҫтырылған

“Башҡортостан Башлығын һайлау – 2024” йәмәғәт матбуғат үҙәгендә һайлау башланыуы тураһында республиканың Үҙәк һайлау комиссияһы рәйесе Азат Ғәлимханов һөйләне. Уның белдереүенсә, республикала 3302 участка, шул иҫәптән дауаханаларҙа, шифаханаларҙа, Федераль яза башҡарыу хеҙмәте учреждениеларында 40 ваҡытлыса участка һәм Мәскәүҙә бер һайлау пункты эшләй. Мәскәүҙә Башҡортостанда теркәлгән һәм баш ҡалала командировкаға, ял көндәрен үткәрергә йәки баш ҡалала эшләүселәр килә ала. Башҡортостанда һәр һайлау участкаһында полицейскийҙар, МЧС хеҙмәткәрҙәре йәки участка һайлау комиссияһы ағзалары дежур итә. Быларҙың барыһы ла хәүефһеҙлек тәьмин итеү өсөн кәрәк. Һайлаусылар исемлегендә Башҡортостандан бөтәһе 2 969 775 кеше. Һайлауҙа 16 712 күҙәтеүсе, 115 киң мәғлүмәт сараһынан 457 аккредитланған журналист эшләй. Азат Ғәлимханов беҙҙең һорауға яуап биреп, республикала баҫтырылған бюллетендәрҙең 16 проценты башҡорт телендә тине. – Башҡорт телендәге бюллетендәр, комиссия ағзаларының алдағы йылдарҙағы ихтыяжды иҫәпкә алып ебәргән мәғлүмәттәрен сығып, һәр участкаға етерлек кимәлдә ебәрелә, – тине ул. Айрат Нурмөхәмәов фотоһы.