"Туристар һаны артҡан һайын, беҙ үҫәбеҙ һәм үҫешәбеҙ"

Һуңғы йылдарҙа “Башҡортостан ҡурсаулығы” федераль дәүләт бюджет учреждениеһы биләмәһендә экологик туризмды үҫтереү әүҙем бара. Кешеләрҙең тыныслыҡҡа, тынлыҡҡа, тәбиғәт ҡосағына ынтылыуы һөҙөмтәһендә туристар һаны йылдан-йыл арта. – Беҙ иһә, үҙ сиратыбыҙҙа, туристарҙың мәнфәғәтен яҡларға һәм биләмәбеҙҙә инфраструктураны үҙ көсөбөҙ менән яҡшыртырға тырышабыҙ. Әлеге ваҡытта Башҡортостан ҡурсаулығы биләмәһендә төрлө ҡатмарлыҡтағы һәм оҙонлоҡтағы өс экологик һуҡмаҡ булдырылған. Тәбиғәт музейы эшләй, маралдар менән күрһәтеү-тәжрибә майҙансығы, ҡунаҡ йорттары, ат маршруттары бар. Ял көндәре турҙары ойошторола, катамарандарҙы ҡуртымға бирәбеҙ һәм һыуҙа ағалар. Турбазалар һәм турагентлыҡтар менән тығыҙ эш алып барабыҙ, – тип һөйләне Башҡортостан ҡурсаулығы директоры Айнур Бейембәтов. Шулай уҡ ваҡиғалар туризмы таралыу алған – йыл һайын Башҡортостан ҡурсаулығы биләмәһендә башҡорт халҡының йолаларын тергеҙеүгә арналған Урал батырҙың ҡышҡы уйындары үткәрелә, “Ылаҡ”, ат сабыштары, “Ауҙарыш”, “Суҡмар ырғытыу” кеүек уйындар үткәрелә. Шулай уҡ 2023 йылда “Экология” милли проектының “Биологик төрлөлөктө һаҡлау һәм экологик туризмды үҫтереү” федераль проектын тормошҡа ашырыу буйынса Башҡортостан ҡурсаулығында туристарҙы урынлаштырыу өсөн милли стилдә өс бөтә миҙгел тирмәһе ҡуйылған һәм файҙаланыуға тапшырылған. “Туристар һаны артҡан һайын, беҙ үҫәбеҙ һәм үҫешәбеҙ. Барлыҡ теләүселәрҙе беҙҙең территорияға килеп, тәбиғәткә яҡыныраҡ булырға саҡырабыҙ”, – тип белдерҙе ҡурсаулыҡ директоры. Мәғлүм булыуынса, 2023 йылда Башҡорт дәүләт тәбиғәт ҡурсаулығында 2878 кеше ял иткән. Ҡурсаулыҡ тарафынан ике экологик лагерь ойошторолған. Туристик хеҙмәттәрҙең һәм инфраструктураның сифатын яҡшыртыу төбәккә аҡса ағымын арттырыу мөмкинлеге бөтә тармаҡ (төҙөлөш, сәнәғәт, транспорт, хеҙмәтләндереү өлкәһе һәм башҡалар) күрһәткестәренә үҫтереү мөмкинлеге бирә. Бөрйән районында туризмды үҫтереү өлкәһендә 2019 йылдан алып бер нисә ҙур проект тормошҡа ашырылды. “Шүлгән-таш” тарихи-мәҙәни музей комплексы төҙөлдө. Туризмды тағы ла йәнләндереү маҡсатында юл буйы сервисы – туҡталҡалар булдырылды. Киләһе йылдарҙа Морат туғайында ҡунаҡхана комплексы төҙөү планлаштырыла. Башҡортостанда туризм тармағын үҫтереү буйынса системалы эш бер нисә йыл дауамында әүҙем алып барыла. 2019 йылда уҡ Башҡортостан Башлығы эске туризмды үҫтереүгә арналған махсус кәңәшмәлә республикала туристик инфраструктураның тейешле торошона иғтибар итте. Һуңғы биш йылда республикала туризм тармағы үҫешә, быны статистика һандары раҫлай. Мәҫәлән, 2018 йылда республикаға туристар ағымы 1,169 миллион кеше тәшкил иткән, ә 2023 йылда – 2,2 миллион. Был 2022 йылға ҡарағанда 14 процентҡа юғарыраҡ. Ошо күрһәткес буйынса республика Волга буйы федераль округында – өсөнсө, Рәсәйҙә 12-се урынды биләй. Республика “Туризм һәм ҡунаҡсыллыҡ индустрияһы” милли проектын уңышлы тормошҡа ашыра, ә төбәктә туристик инфраструктураны үҫтереү өҫтөнлөклө бурыстарҙың береһе булып тора. Республика Хөкүмәте мәғлүмәттәре буйынса, 2023 йылда ошо маҡсатҡа 1,5 миллиард һум федераль саралар йәлеп ителгән. Был төбәккә туристар ағымын арттырыуға ҙур өлөш индерә. Бөгөн Башҡортостан туристар өсөн, уларҙың мәнфәғәттәренә ҡарап, төрлө мөмкинлектәр тәҡдим итә. Күп кенә мөһим проекттар Башҡортостан Башлығы Радий Хәбировтың әүҙем ярҙамы менән тормошҡа ашырыла. Башҡортостандың эске туризм инфраструктураһын үҫтергән компаниялары һәм эшҡыуарҙары конкурс нигеҙендә яңы туристик маршруттар әҙерләүгә, кемпингтар булдырыуға, пляждарҙы һәм балалар ялы зоналарын төҙөкләндереүгә, ҡорамалдар һәм инвентарь һатып алыуға, мөмкинлектәре сикләнгән кешеләргә ял итеү өсөн шарттар булдырыуға һәм башҡаларға гранттар ала. Фотолар сығанағы: Башҡортостан ҡурсаулығы. .