Луганск Халыҡ Республикаһына эш сәфәрендә төбәк Башлығы Радий Хәбиров Красный Луч ҡалаһының социаль объекттарын ҡараны. Уларҙы Башҡортостан төҙөүселәре ремонтлағайны. Красный Лучтағы 9-сы мәктәптә тәҙрәләрҙе алмаштырҙылар һәм бинаның ҡыйығын ипкә килтерҙеләр. Белеүебеҙсә, 2023 йылда Башҡортостан белгестәре тарафынан модулле ҡаҙанлыҡ ҡуйылғайны һәм ул эшләп киткәйне. Республика Башлығы Красный Лучтағы 57-се “Аленушка” балалар баҡсаһын да ҡараны. Бында яңы уҡыу йылы башына республикабыҙ белгестәре йылытыу системаһын алмаштырыҙы, ҡыйыҡты ремонтланы, яңы пластик тәҙрәләр ҡуйҙы. Красный Луч хакимиәтендә төбәк етәксеһе Башҡортостандан медицина белгестәре һәм юл хеҙмәте хеҙмәткәрҙәре менән осрашты. Улар Луганск Халыҡ Республикаһындағы коллегаларына ярҙамға килгән. Республика Башлығы уларға намыҫлы хеҙмәте өсөн рәхмәт белдерҙе һәм урында йәшәүселәргә мөһим, кәрәкле ярҙам өсөн рәхмәт әйтте. Луганск Халыҡ Республикаһында Башҡортостан медицина хеҙмәткәрҙәренең 24-се бригадаһы эшләй. Ҡыуатов исемендәге Республика клиник дауаханаһының рентгенология бүлексәһе мөдире Тимур Шәриповтың смена составында туғыҙ медицина хеҙмәткәре бар. 2022 йылдан алып, Луганск Халыҡ Республикаһында йәшәүселәргә медицина ярҙамын күрһәтеү өсөн Башҡортостандан 632 белгес барҙы, уларҙың 403-ө - табип, 196-һы – урта медицина хеҙмәткәре һәм 28 водитель. Луганск Халыҡ Республикаһында шулай уҡ “Башкиравтодор” компанияһы юл инфраструктураһын теркәү эштәрен алып бара. Бының өсөн предприятие көнөнә 300 тонна етештереү ҡеүәте булған асфальт һәм бетон заводын күсергән. Ике йыл эсендә республика юлсылары дөйөм оҙонлоғо 66 километрҙан ашыу булған 44 участканы ремонтланы. Эштәр Красный Луч, Петровское, Вахрушево ҡалаларында һәм Гәлсәр ҡасабаһында, башҡа муниципалитет-ара юлдарҙа барҙы. 2024 йыл аҙағына тиклем 27 урамда 23,4 километр булған юлда, ун туҡталыш комплексында ремонтлау эштәрен тамамламаҡсылар. Заводта Башҡортостандан 38 кеше эшләй. “Күп йылдар Башҡортостан Луганск Халыҡ Республикаһының ҙур ҡалаһына – Красный Лучҡа – шефлыҡ ярҙамы күрһәтә. Беҙҙең өсөн был – мөһим миссия, сөнки Красный Луч биләмәһендә, Петровскоела, легендар геройыбыҙ Миңлеғәле Шайморатов ерләнгән”, - тип яҙҙы социаль селтәрҙәге сәхифәһендә республика етәксеһе. Сығанаҡ, фотолар: glavarb.ru/rus/press_serv/novosti/183118.html