Фермерҙар – ауылдың киләсәге

Крәҫтиән (фермер) хужалығын алып барыу отошло түгел, иҡтисади яҡтан күп сығымдар талап итә, аҙыҡ-түлек запасын булдырыуға өлөш индермәй тигән ҡараш бөгөн көнүҙәклеген юғалтты. Һуңғы йылдарҙа Хөкүмәт тарафынан күрһәтелгән ярҙам үҙ һөҙөмтәһен бирә башланы. Крәҫтиән (фермер) хужалыҡтарының ил иҡтисадына индергән өлөшө йылдан-йыл арта бара, улар төрлө баһалар буйынса ауыл хужалығы продукцияһының яҡынса 15 процентын етештерә. Кредит ресурстары һәм субсидиялар башлыса эре етештереүселәргә киткәнен иҫәпкә алһаҡ, был һәйбәт күрһәткес икәнлеген аңлайһың. Һәр ауылда тиерлек бер нисә крәҫтиән (фермер) хужалығы эшләп килә. Улар ауыл халҡына социаль мәсьәләләрҙе хәл итергә ярҙам итә: эш менән тәьмин итеү, юлдарҙы таҙартыу, төҙөкләндереү һәм башҡалар. Юрист ер һөрә башлаған Шәхси эшҡыуар, Борай районының крәҫтиән (фермер) хужалығы башлығы Рәмил Зарипов – уңышлы йәш етәксе. 2016 йылда ул үҙенең фермерлыҡ хужалығын ойошторған һәм “Агростартап” программаһында ҡатнашҡан. 2021 йылда “Ғаилә фермаһы” программаһы буйынса грант алған. Ярҙам “Бәләкәй һәм урта эшҡыуарлыҡ, шәхси эшҡыуарлыҡ башланғысына ярҙам” милли проекты сиктәрендә бойомға ашырыла. Бөгөнгә фермер хужалығында 1000 гектар сәсеү майҙаны, 250 баштан ашыу мөгөҙлө эре мал, 50-нән ашыу ат һәм 300 һарыҡ бар. Крәҫтиән-фермер хужалығы ауыл хужалығы продукцияһын етештереүҙән тыш, уны эшкәртә лә. Хәләл стандарты буйынса ит ярымфабрикаттары цехы уңышлы эшләй. Бында 50-нән ашыу төр ит ярымфабрикаттары сығарыла. Әҙер продукцияны республикала “Борай фермеры” бренды аҫтында фирма магазиндары селтәре аша һаталар. Әлеге ваҡытта биш магазин эшләй, шуларҙың дүртеһе – Өфөлә, берәүһе район үҙәгендә. Шулай итеп, хужалыҡ 50-гә яҡын кешене эш урындары менән тәьмин итә алды. Рәмил Зарипов йыл һайын агросәнәғәт комплексы эшҡыуарҙары һәм хеҙмәт коллективтары араһында республика конкурстары лидеры булып тора. Райондың крәҫтиән (фермер) хужалыҡтары араһында 2023 йылда яҙғы баҫыу эштәрен сифатлы башҡарған һәм ҡышҡы осорҙа малсылыҡ продукцияһын етештереүҙе арттырған өсөн ярыш һөҙөмтәләре буйынса Р.А. Зарипов крәҫтиән (фермер) хужалығы 2-се урынды биләй. Илшат ФӘЗРАХМАНОВ, Башҡортостан Хөкүмәте Премьер-министры урынбаҫары – ауыл хужалығы министры: - Һуңғы биш йылда крәҫтиән (фермер) хужалыҡтары һаны 1,3 тапҡырға, кооперативтар һаны ике тапҡырҙан ашыуға артҡан. Йыл башынан ғына тағы ла 22 кооператив булдырылған. Бөгөн республикала 445 ауыл хужалығы предприятиеһы эшләй, шуларҙың 259-ы ауыл хужалығы продукцияһын эшкәртеү менән шөғөлләнә. Килемдәренең дөйөм күләме өс миллиард һумға етте, сеймалды эшкәртеү күләме йылына 110 мең тонна тәшкил итә. Ауылда кооперативтарҙың төп эш йүнәлештәре булып һөт һәм ит эшкәртеү, шулай уҡ төрлө сәй һәм үлән әҙерләү, еләк, бәшмәк һәм йәшелсә, мал аҙығы һәм башҡа аҙыҡ-түлек етештереү тора. 169 кооперативтың әҙер продукцияһы 2,5 меңдән ашыу сауҙа нөктәһендә һатыла. Элегерәк 900 сауҙа нөктәһенә оҙатыла ине. Радий ХӘБИРОВ, Башҡортостан Башлығы: “Башҡортостан – сәнәғәт һәм ауыл хужалығы берҙәй ныҡлы үҫешкән төбәк. Ауылдарҙа беҙҙең мәҙәниәтте һаҡлап ҡалыуға ҙур көс һалабыҙ. Республикала биш йөҙ меңдән ашыу кеше ауылда йәшәй. Ауылды һаҡлап ҡалыр өсөн күпте эшләйбеҙ. Ауыл – беҙҙең тамырҙар. Тап ауылда сифатлы аҙыҡ-түлек етештерелә. Һөт, итте Рәсәйҙең башҡа төбәктәренә ҡарағанда күберәк етештерәбеҙ”.