– Бәләкәй саҡтан башҡорт йырҙарын тыңлап һәм йырлап үҫтем, төрлө конкурстарҙа ҡатнаштым. 2022 йылда “Тамырым – башҡорт!” проекты буйынса Башҡортостанға килгәс, минең артабан ошонда уҡығым һәм йәшәгем килде, үҙемде өйөмдә кеүек тойҙом. Бөгөн Рәми Ғарипов исемендәге 1-се Башҡорт республика гиназия-интернатында уҡыуым менән бәхетлемен. VII класҡа килгәйнем, быйыл туғыҙынсыға күстем, – ти Фирүзә. “Тамырым – башҡорт!” проектын Башҡортостан Республикаһының Мәҙәниәт министрлығы һәм Халыҡтар дуҫлығы йорто үткәрә. Сара барышында Силәбе, Ырымбур, Төмән, Свердловск, Ҡурған өлкәләренән һәм Пермь крайынан килгән 60 үҫмер аҙна дауамында Башҡортостандың иҫтәлекле урындарына бара, башҡорт халҡының мәҙәниәте менән таныша, шулай уҡ республиканың интернатлы- гимназияларында, юғары уҡыу йорттарында була. – Ике йыл эсендә өс тапҡыр “Тамырым – башҡорт!” проектын ойошторҙоҡ. Һөҙөмтәлә унлаған бала Башҡортостандағы интернат-гиназияға уҡырға инде. Миҫал өсөн, ошо аҙнала Ырымбур өлкәһенән өс бала яңы уҡыу йылын Өфөләге Ғәзиз Әлмөхәмәтов исемендәге Республика интернат-гимназиһында ҡаршыланы. Киләсәктә беҙҙәге белем усаҡтарына килеүселәрҙең һаны тағы ла артыр, тип уйлайбыҙ, сөнки үҫмерҙәр проект аҙағында һәр саҡ Башҡортостандан, туған мөхитенән айырылырға теләмәй, кире киләсәкбеҙ, тип ҡайтып китә, – ти БР Халыҡтар дуҫлығы йорто директоры Эльмира Саматова. Иҫегеҙгә төшөрәбеҙ, башҡорттар күпләп йәшәгән Рәсәй субъекттарында һәм сит илдәрҙә башҡорт мәҙәниәтен һаҡлау һәм популярлаштырыу маҡсатында Башҡортостан Башлығы Радий Хәбиров булышлығында 2020 йылда башҡорт тарихи-мәҙәни үҙәктәре асылды. – Бындай үҙәктәр бөгөн Ырымбур, Свердловск, Силәбе, Ҡурған өлкәләрендә, Пермь крайында, Ханты-Манси автономиялы округында - Юграла уңышлы эшләп килә, - тине республиканың мәҙәниәт министры Әминә Шафиҡова. – Рәсәй төбәктәрендә һәм сит илдәрҙә йәшәгән яҡташтарыбыҙ өсөн 2023 йылда халыҡ ижады буйынса 24 оҫталыҡ дәресе уҙғарылды, башҡорт милли кейемдәрен, тирмәләрен, башҡорт телендәге китаптарҙы, милли уйын ҡоралдарын тегеүҙә һәм тапшырыуҙа ярҙам күрһәтелде. Фото: БР Халыҡтар дуҫлығы йорто.