Ҡалала йәшә лә, ауылды маҡта тиҙәр. Ә бына ауылда йәшәүселәр ҡаланы һағынамы икән? Юҡтыр. Саф һауа, тыныс мөхит һәм иң мөһиме – эштең эргәлә булыуы һайланған юлдың дөрөҫ булыуына тағы бер ишара, ти Туймазы районында йәшәгән йәштәр. Мәҙәни усаҡтар ауыл йылыһын һаҡлай “Ауылдың мәҙәниәт хеҙмәткәре” прораммаһы республикала 2021 йылдың сентябренән тормошҡа ашырыла башланы. Программа ярҙамында күп кенә мәсьәләләр тормошҡа ашты: йәш белестәрҙе ылыҡтырыу, кадрҙар етешмәү хәл ителде. Программа эш башлаған йылда уҡ 49 райондан 60 кеше 500 мең һумлыҡ ярҙам алды. Был аҡсаны 27 кеше фатир йә йортҡа тәүге иғәнә итеп тотондо. Өс йыл эсендә иһә 120 белгес йәшәү шарттарын яҡшыртты. Был маҡсатҡа 75 миллион һум аҡса бүленде. 2025 йылдан әлеге программа бөтә Рәсәй буйынса эшләй башлаясаҡ. Был хаҡта Рәсәй Президенты Владимир Путин үҙенең Федераль Йыйылышҡа Мөрәжәғәтнамәһендә белдерҙе. Радий ХӘБИРОВ, Башҡортостан Башлығы: "Мәҙәниәттең сиктәре юҡ. Был ҡорал кешеләрҙе, ҡайҙа йәшәүенә, ниндәй телдә һөйләшеүенә, ниндәй дингә табыныуына ҡарамаҫтан, берләштереү көсөнә эйә”. Туймазы районын үҙ иткәндәр Райондың Собханғол ауылындағы балалар мәҙәниәт мәктәбендә эшләгән ике уҡытыусы – Юлиә Мостафина менән Роберт Гәрәев 500 мең һумлыҡ сертификат алған. Юлиә Мостафина сәнғәткә тап ошо мәктәп аша килә. Унан Өфөлә, Заһир Исмәғилев исемендәге сәнғәт институтында белем ала. Концертмейстер дипломы алып, тыуған яғына ҡайтып, үҙе тамамлаған мәктәптә уҡыта башлай. Роберт Гәрәевтең дә яҙмышы Юлиәнекенә оҡшаш. Туймазылағы музыка мәктәбендә думбыра буйынса класты тамамлап, Октябрьский ҡалаһындағы музыка колледжында белем ала, һуңынан Собханғолға килеп эшләй башлай. - Ҙур ҡалала һине белмәйҙәр, танымайҙар. Күренмәгән кеше булып йәшәйһең. Беҙҙең ауылда һигеҙ меңдән ашыу кеше йәшәй һәм барыһы ла һине танып, уҡытыусы булғаның өсөн хөрмәт итәләр, – ти ул. Музыка мәкәбендә йәштәрҙең башланғыстарын һәр яҡлап хуплап торалар. Мәҫәлән Роберттың үтенесе буйынса бер нисә гитара һатып алалар, хәҙер балалар гитара түңәрәгенә теләп йөрөй. Мәктәп етәкселеге “Ауыл мәҙәниәт хеҙмәткәре” программаһы тураһында ишетеү менән йәштәргә документтарҙы юлларға ярҙам итә. Грант аҡсаһын һәр кем үҙенсә файҙалана. Мостафиндар ғаиләһе әсәлек капиталы сертификатын һәм ошо грант аҡсаһын ҡушып, Нөркәй ауылында йорт һатып ала. Ә Роберт Гәрәев ошо уҡ ауылда өй һала башлай. Собханғолға тиклем был ауылдан ни бары 15 минутлыҡ юл. Был ара йәш уҡытыусыларҙы ҡурҡытмай. ФЕКЕР Рәмзиә САФУАНОВА: - Балаларым музыкаль инструментта уйнай белһен ине тип теләнем. Өс баламдың береһе генә был уйымды тормошҡа ашырҙы. Улым тәүҙә музыка мәктәбендә аккордеонда уйнарға өйрәнде. Хәҙер иһә гитара түңәрәгенә теләп йөрөй. Ҡыуанам. Уҡытыусыларының йәш, талантлы булыуы ла балаларҙы илһамландыра. Фотолар “Туймазинский вестник” гәзитенән.