Иртәгә Башҡортостанда, бөтә илдәге кеүек үк, тауыш биреү башлана. Илдәге мөһим сәйәси сара ойошҡан һәм етешһеҙлекһеҙ үтһен өсөн унда бик ҙур армия белгестәре эшләйәсәк. Шуларҙың бер өлөшө – йәмәғәт күҙәтеүселәре. Башҡортостанда был эштең нисек ойошторолоуо тураһында һөйләр өсөн бөгөн республиканың Йәмәғәт палатаһында матбуғат конференцияһы үтте. Палата рәйесе Данияр Абдрахманов, уның урынбаҫары, Башҡортостанда һайлау барыуын күҙәтеү буйынса Йәмәғәт штабы етәксеһе Лида Исәргәкова журналистар менән аралашты һәм ҡыҙыҡһындырған һорауҙарға яуап бирҙе. Шулай итеп, Башҡортостан был һайлау өсөн 13 меңдән ашыу йәмәғәт күҙәтеүсеһе әҙерләгән. Был кешеләрҙең күбеһенең бынан алдағы сәйәси кампанияларҙа эшләү тәжрибәһе бар. Улар махсус рәүештә уҡыған һәм төплө әҙерлек үткән. Араларында уҡытыусылар, табиптар, студенттар, йорт хужабикәләре, пенсионерҙар бар. Башлыса ҡатын-ҡыҙҙар эшләй. Лида Исәргәкова әйтеүенсә, сәнәғәт предприятиелары урынлашҡан ҡалаларҙа күҙәтеүселәр араһында ир-егеттәрҙең күп кенә булыуы күҙәтелә. – Күҙәтеүселәр ҡайһылыр билдәле бер кандидат йәки партия еңһен тип теләмәй. Улар өсөн иң мөһиме – һайлау процесының законға ярашлы үтеүе, етешһеҙлектәргә юл ҡуйылмауы. Улар төрлө низағлы хәлдәрҙән нисек сығырға, кешеләргә төрлө мәсьәләләр буйынса нисек ярҙам итергә уҡытылған. Ә дөйөм алғанда, Башҡортостанда һайлау һәр ваҡыт ойошҡан үтә, әллә ниндәй закон боҙоу осраҡтары ла булмай тиерлек. Быйыл да эш тыныс үтһен тип теләйбеҙ, – тине Данияр Абдрахманов. Лида Исәргәкова һөйләүенсә, былтырғы йыл тәжрибәһе буйынса был юлы ла эшкә блогер-күҙәтеүселәр йәлеп ителәсәк. Улар һәр бер һайлау участкаһында бар. Был кешеләр менән уҡытыу тағы ла төплөрәк үткән, улар һайлау барышын социаль селтәрҙә һәм матбуғат сараларында нисек яҡтыртырға икәнлеген дә белә. Фотолар Йәмғәт палатаһынан.