Радиометрия буйынса ярыш Өфө районындағы “Патриот” паркы артындағы майҙанда уҙҙы. Ойоштороусылар полигонда бер нисә әйберҙе күмеп һалған, ә йәштәр радиометр ярҙамында тайпылыштарҙы билдәләп, күрһәткестәрҙе отчетҡа индергән, карта төҙөгән. – Һәр тау тоҡомоноң радиация әүҙемлеге төрлө була һәм үлсәнгән күрһәткестәр буйынса теге йәки был урында ниндәй файҙалы ҡаҙылма сығыуын билдәләргә мөмкин, – тип аңлатты Рәсәй Фәндәр академияһыӨфө федераль тикшеренеү үҙәгенең Геология институты директоры һәм “ГеоСаҡырыу”ҙың баш судьяһы Сергей Ковалёв. Ҡазан федераль университеты командаһы ағзалары билдәләүенсә, радиометрия буйынса ярыш – иң ҡатмарлыһы. Әйткәндәй, былтыр был вуздың йыйылма командаһы «ГеоСаҡырыу» чемпионатында беренсе урынды яуланы. – Чемпионатты ойоштороусыларға, Рәсәй ер аҫты байлыҡтарынан файҙаланыу агентлығына, Башҡортостан Республикаһына һәм шәхсән республика Башлығы Радий Хәбировҡа йылы ҡабул иткәндәре өсөн рәхмәт, – ти Ҡазан командаһынан студент Ынйы Шакирова. – Был чемпионатҡа беҙҙән күптәр килергә теләне, әммә һайлап алыу турынан һуң бындай бәхет бик әҙҙәргә генә эләкте. Радиометрия буйынса ярыштар менән бер рәттән "Минералогия һәм петрография" һәм "Палеонтология" тигән һынауҙар уҙҙы. Артабан йәш геологтар Ғафури районында башҡа төр һынауҙарҙы үтәсәк. Иҫегеҙгә төшөрәбеҙ, "ГеоСаҡырыу" 9 сентябргә тиклем дауам итә. Унда Воронеж, Красный Луч, Владивосток, Грозный, Ҡазан, Октябрьский, Мейәс, Мәскәү, Новосибирск, Һамар, Санкт-Петербург, Ставрополь, Төмән, Өфө ҡалаларынан һәм Яҡут Республикаһынан, шулай уҡ Ҡытай, Көньяҡ Африка Республикаһы, Мозамбик, Зимбабве, Эфиопия, Гвинея, Үзбәкстан һәм Грузия илдәрнән командалар ҡатнаша. Башҡортостандан Өфө дәүләт нефть техник университеты, Өфө фән һәм технологиялар университеты, Октябрьский нефть колледжы, Аҡъяр тау колледжы командалары сығыш яһай. Андрей Старостин фотолары.