Радий Хәбиров Донбасста Башҡортостан яугирҙәре менән осрашты

Ул унда яҡташтарыбыҙ – исемле батальондарҙың ирекмәндәре һәм мобилизацияланған хәрбиҙәр менән осрашты. Атап әйткәндә, төбәк етәксеһе ”Башҡортостан” мотоуҡсылар полкы подразделениеларының береһендә булды, командование һәм шәхси состав менән аралашты, пилотһыҙ осоу аппараттары операторҙарының эше менән танышты. – Һеҙгә Башҡортостан халҡынан сәләм еткерәм. Республика Ватанды һаҡлаусыларға, уларҙың туғандарына һәм яҡындарына һәр яҡлап ярҙам күрһәтеүен дауам итәсәк. Үҙегеҙҙе һаҡлағыҙ, ҡуйылған бурыстарҙығыҙҙы үтәп, һау-сәләмәт әйләнеп ҡайтығыҙ, – тине төбәк Башлығы. Хәрби хеҙмәткәрҙәрҙең үтенесе буйынса республика Башлығы Радий Хәбиров подразделение яугирҙәре өсөн БПЛА һәм радиоэлектрон көрәш саралары менән өҫтәмә тәьмин итеүҙе әҙерләргә ҡушты, шулай уҡ алдынғы һалдаттарға һәм офицерҙарға Башҡортостандың дәүләт наградаларын тапшырҙы. *** Төбәк етәксеһе Миңлеғәле Шайморатов исемендәге батальондың бронетөркөмөндә булғанда хәрбиҙәр менән аралашты һәм уларға Башҡортостандың дәүләт наградаларын тапшырҙы. Яугирҙәр республика Башлығына дошмандың бәреп төшөрөлгән “пилотһыҙ осоусы аппаратын” бүләк итте һәм шулай уҡ подразделениены БПЛА һәм башҡа ҡорамалдар менән тәьмин итеүҙә ярҙам һораны. *** Артабан Башҡортостан Башлығы мобилизацияланған хәрбиҙәрҙән – республика халҡынан төҙөлгән полктың дислокация урынында булды. Бында төбәк етәксеһе подразделение командованиеһы һәм Александр Доставалов исемендәге батальондың шәхси составы менән аралашты. Радий Хәбиров шулай уҡ алдынғы хәрби хеҙмәткәрҙәрҙе бүләкләне һәм яугирҙәргә кәрәкле техниканы өҫтәмә тәьмин итеү буйынса йөкләмә бирҙе. *** Эш сәфәре барышында Башҡортостан Башлығы Салауат Юлаев исемендәге беренсе батальонда булды. Республика етәксеһе хәрби хеҙмәткәрҙәрҙең үтенестәрен һәм теләктәрен тыңланы һәм тейешле йөкләмәләр бирҙе. – Был сәйәхәттең үҙ мәғәнәһе булды. Республика яугирҙәргә Башҡортостанда йыйылған ҡорал ташыуҙың яңы осоу аппараттарын ебәрә башланы, шуға ла уларҙың ни тиклем һөҙөмтәле булыуын аңлау мөһим ине. Аралашыу барышында беҙ бер нисә баһа алдыҡ. Дөйөм алғанда, беҙҙең әйберҙәр бик юғары баһалана, – тип йомғаҡ яһаны төбәк етәксеһе Радий Хәбиров. – Һәм, әлбиттә, яугирҙәрҙән туғандарына һәм яҡындарына ниндәйҙер ярҙам кәрәкме, тип һорайбыҙ. Улар Ватаныбыҙҙы һаҡлай, шуға күрә республика уларҙың ғаиләләре хаҡында хәстәрлек күреүен дауам итәсәк. Фото: glavarb.ru