“Бәләкәй һәм урта эшҡыуарлыҡ һәм шәхси эшҡыуарлыҡ башланғысына булышлыҡ итеү” милли проектына ярашлы, Башҡортостан микрокредит компанияһы республиканың шифахана-профилакторийына өс миллион һум күләмендә ярҙам күрһәтте, тип хәбәр итә Эшҡыуарлыҡ һәм туризм министрлығы. Аҡса флюорография үткәреү өсөн заманса аппарат алыуға йүнәлтелгән. - Һуңғы йылдарҙа милли проект саралары һәм Башҡортостан Башлығы Радий Хәбиров башланғысы һөҙөмтәһендә эшҡыуарлыҡҡа дәүләт ярҙамы саралары байтаҡҡа киңәйтелде. Хәҙерге ваҡытта социаль предприятиелар ярҙам күрһәтеү өсөн өҫтөнлөккә эйә. Был төркөм эшҡыуарҙары өсөн микрозаймдар йылына һигеҙ процентлы льготалы ставка менән бирелә, – тигән аңлатма бирҙе эшҡыуарлыҡ һәм туризм министры Зөһрә Гордиенко. “Березка” шифахана-профилакторийы инвалид балаларҙы, коронавирус кисергән пациенттарҙы, шулай уҡ хеҙмәткә һәләтле йәштәге II йәки III төркөм инвалидтарын, махсус хәрби операцияла ҡатнашыусыларҙы дауалауҙа махсуслашҡан. Рәсәй Президенты Владимир Путиндың май указдарына ярашлы, 2024 йылға ил үҫешенең төп маҡсаттарына өлгәшергә кәрәк. Шуларҙың араһында халыҡ һанын арттырыу, граждандарҙың тормош сифатын яҡшыртыу, иҡтисадҡа һәм социаль өлкәгә һанлы технологиялар индереү мөһим бурыстар булып тора. ”Һаулыҡ һаҡлау” милли проектының (национальный проект “Здравоохранение) төп маҡсаты – хеҙмәткә һәләтле йәштәге халыҡтың үлем күрһәткестәрен, ҡан әйләнеше сирҙәренән, яман шештәрҙән үлем осраҡтарын кәметеү, инновациялы медицина технологиялары индереү, шул иҫәптән пациенттар сәләмәтлеген иртә диагностикалау һәм дистанцияла мониторинг үткәреү алымдарын ҡулланыу. Һаулыҡ һаҡлауҙың тәүге звеноһын яңыртыу программаһы маҡсаты – сифатлы һәм һәр кем файҙаланырлыҡ медицина ярҙамы күрһәтеү, шул иҫәптән төпкөлдә, бәләкәй тораҡтарҙа йәшәгән халыҡ өсөн. Фото: БР Эшҡыуарлыҡ һәм туризм министрлығы.