Балаларыбыҙ белемле генә түгел, сәләмәт тә булырға тейеш

МӘҒАРИФ Республикабыҙҙың мәғариф тармағы һуңғы йылдарҙа матур үҙгәрештәр кисерә. Белем биреүҙең асыҡлығын һәм һөҙөмтәлелеген арттырыу өсөн системалы эштәр башҡарылды: мәктәптәр төҙөлә, уларҙың матди-техник йыһазландырылыуы яҡшыра, уҡытыусылар һәм уҡыусылар өсөн дәртләндереү саралары булдырыла, илдә иң яҡшы уҡытыу тәжрибәләре индерелә. Мәғариф – властарҙың айырым хәстәрлегендәге өлкә. “Балаларыбыҙға һәр мәктәптә – төпкөлдә лә, ҡалаларҙағы яңы биҫтәләрҙә лә сифатлы белем һәм тәрбиә биреү өсөн бөтә шарттар булдырылыуы мөһим”, – тине республика Башлығы Радий Хәбиров. Быға тиклем белем усаҡтарын капиталь ремонтлауға ҡағылышлы программаның уңышлы тормошҡа ашырылыуы, мәктәп йәшендәге уҡыусыларға тәғәйенләнгән социаль ярҙам саралары, мәктәп туҡланыуын ойоштороуҙағы ыңғай үҙгәрештәр тураһында һөйләгәйнек. Мәҫәлән, беҙҙең республика төҙөлөш һәм мәктәптәрҙе капиталь ремонтлау буйынса Волга буйы федераль округында беренсе урынды биләй. 2019-2023 йылдарҙа төбәктә 777 мәктәп төҙөкләндерелгән. Бөгөнгө һүҙебеҙ белем усаҡтарында асылған стоматология кабинеттары тураһында. Республикала мәктәп медицина хеҙмәте әүҙем үҫешә. Белем усаҡтарында оҙаҡ ваҡыт эсендә тәүге тапҡыр стоматология кабинеттары барлыҡҡа килде. Уларҙың һаны буйынса ил төбәктәре араһында алдынғы урынды биләйбеҙ. Әле республика мәктәптәрендә 239 стоматология кабинеты эшләй, шуларҙың яртыһы “Сәләмәт йылмайыу” проекты буйынса асылды һәм заманса ҡорамалдар менән йыһазландырылды. – Былтырғы уҡыу йылында стоматологтар 290,7 мең уҡыусыны ҡараған. 67 меңгә яҡын бала ошонда уҡ, мәктәптәрҙә, санация процедураһын үткән. Етди проблемалары асыҡланғандарҙы махсус дауалауға ебәрәләр. Шуныһы мөһим: мәктәп стоматология кабинеттарында уҡытыусыларға ла ярҙам итәләр. Уҙған йылда бында 5130 уҡытыусы ҡабул ителгән, – тигән мәғлүмәттәр килтерә төбәктең Һаулыҡ һаҡлау министрлығы. Етәкселек 500-ҙән ашыу бала уҡыған һәр мәктәпте заманса стоматология кабинеттары менән йыһазландырыу бурысын ҡуя. Бәләбәй башҡорт гимназия-интернатының да үҙ стоматология кабинеты бар. Ул 2019 йылда “Мәктәптәрҙә стоматология кабинеттары” программаһына ярашлы асылған һәм хәҙерге заман талаптарына ярашлы йыһазландырылған. – Гимназия-интернат бинаһында стоматология кабинеты булыуы шул тиклем уңайлы. Беҙҙә 10 райондан килгән балалар уҡый, улар өсөн был айырыуса кәрәкле, сөнки ял көндәрендә генә ҡайтып йөрөгән уҡыусылар ваҡытында теш табибына күренә алмай. Белгестәр төп иғтибарҙы дауалауға ғына түгел, иҫкәртеү сараларын уҙғарыуға ла йүнәлтә. Май аҙағында балалар баҡсаһын тамамлаған кескәйҙәрҙе профилактик ҡарауға ҡабул иттеләр, әле яңы уҡыу йылы башланыу менән уҡыусыларҙан заявкалар ҡабул итеү башланды. Балаларҙың һау-сәләмәт үҫеүен хәстәрләгәне, ошондай мөмкинлектәр булдырғаны өсөн республика етәкселегенә ҙур рәхмәт! – тине белем усағының директоры Дилбәр Ғайса ҡыҙы Фәтхетдинова. Әҙилә ӘҺЛИУЛЛИНА, Өфө ҡалаһының 21-се лицейы уҡыусыһы: – Беҙҙең лицейыбыҙҙа стоматология кабинеты эшләй. Беҙ унда класс менән медицина тикшереүе үтәбеҙ. Шулай уҡ кемдәрҙең ҡапыл теше һыҙлай, улар ҙа ошо кабинетҡа йөрөй. Табиптар беҙгә тештәрҙе һаҡлау тураһында ла һөйләй, уларҙы дөрөҫ таҙаларға өйрәтә. Айрат Нурмөхәмәтов фотолары.