Беҙҙең Ватаныбыҙ берәү!

Мәләүез районы һәм ҡалаһы ирекмәндәре эшмәкәрлегенә бәйле булған “Добрые люди” ("Изгелекле кешеләр") хәрәкәтенә Мәскәү ҡалаһында йәшәгән яҡташыбыҙ Александр Валиков 2013 йылда нигеҙ һалған. Ауыр сиргә юлыҡҡан яҡташыбыҙ ҡасандыр күптәрҙең ярҙамын тойған. Үлем менән күҙгә-күҙ осрашҡан саҡтан уның донъяға, кешеләргә ҡарашы үҙгәргән. “Изгелекле кешеләр” башта балалар йорттарына, мохтаж ғаиләләргә ярҙам иткән. Махсус хәрби операция башланғас, Александрҙың ағаһы Денис Михайлович та Мәләүездә яугирҙәргә адреслы ярҙам ойоштора. “Беҙҙең төркөмдә мең ярымға яҡын кеше, улар ватсап бәйләнеше, Телеграм каналы һәм башҡа социаль селтәрҙәр аша хеҙмәттәшлек итә”, - ти ирекмән. Өс бала әсәһе Гөлфиә Хәсәнова страховкалау буйынса агент булып эшләй, ул - Денис Валиковтың уң ҡулы. Офис өсөн ҡала хакимиәте ике бүлмә биргән, үҙ көстәре менән ремонт эшләгәндән һуң, яҡтылыҡ үткәрергә генә ҡалған. Яугирҙәрҙең мөрәжәғәте, үтенесе булыу менән ирекмәндәр кәрәк-яраҡ туплай. Уларҙы үҙ машинаһына тейәп, Денис Михайлович Александр Воронков менән юлға сыға, яғыулыҡ хаҡын да үҙ иҫәбенән түләй. Әңгәмәләшкән арала тирә-яҡҡа күҙ йүгертәм: стенаның бер яғына яуҙа һәләк булғандарҙың фоторәсемдәре эленгән. - “Шах” ҡушаматлы яугир һәләк булғас, машинаһын яҡындарына алып ҡайтып тапшырҙыҡ”, - кисен генә яраланған яугир менән һөйләшеп, иртәгәһенә яу яланынан окопташтарын сығарғанда һәләк булған “Шах”ты һәм башҡа яугирҙәрҙе юғалтыуҙы Денис бик ауыр кисерә. Икенсе стенала - ирекмәндәрҙең яугирҙәр менән осрашҡан мәлдәре. Бер фотографияла Салауат исемендәге хужалыҡ етәксеһе Рәмис Иманғолов, фермер Алексей Рогов, ирекмән Азамат Рафиҡовты сырамытам. Күп етәкселәр ҡылған изге эштәрен таратмауҙы һорай. Бына яңыраҡ берәү (ул да билдәһеҙ булып ҡалырға теләгән) машинаға прицеп һатып алып биргән. Яҡташ спецназовсы яугир күҙгә ташланып бармаған техника һорағас, һатып алып, автосервиста ремонтлап, алып барғандар. Яугирҙәр рэб-станция, тепловизор, квадракоптерҙар һорай - былар барыһы аҡсаға барып төртөлә. “Крафт”, “Сервер”, “Шөрөп” магазины етәкселәре, ҡаланың үҙәк баҙары, балалар баҡсалары коллективтары һәм бик күптәр ярҙам ҡулын һуҙырға һәр саҡ әҙер. - Тамсынан күл йыйыла: һәр кеше 100-200 һум аҡса күсерһә лә - ҙур ярҙам. Ил сиген емереп дошман һөжүм итә икән, битараф ҡалырға тейеш түгелбеҙ, - ти Гөлфиә Хәсәнова. “Добрые люди” ирекмәндәре ике йыл эсендә махсус хәрби операция биләмәһенә 200 рейс эшләгән, шуларҙың туғыҙы Денис иҫәбендә. Башта Пенза ҡалаһына ташыған, хәҙер Луганск, Херсон өлкәһенә, ДНР-ға барып етә, Ростовҡа инеп госпиталгә медикаменттар ҡалдыра. Офистың бүлмәһендә нимә генә юҡ: консервалар, йыуыныу һәм түшәк кәрәк-яраҡтары, "ҡоро душ", таҫтамалдар, сәй үләндәре, окоп шәмдәре, кейемдәр. "Ҡоро душ" антисептигын ирекмәндәр үҙҙәре сепрәккә һеңдереп, төргәктәргә һала. Мәҡәләне илһөйәрлек тойғоһон тәрбиәләүгә ҡағылышлы һорау менән башлағайным. Минеңсә, кешенең үҙаңы ғаилә, йәмғиәт, дәүләт кимәлендә формалаша. Тыуған ил, Ватан берәү генә була, ошонда атай-олатайҙар ерләнгән, беҙҙең байлыҡ – тыуған илебеҙ, халҡыбыҙ. Шул ҡиммәттәрҙе аңлаған кешелә генә илһөйәрлек тойғоһо була, һәм ул мәрхәмәтлек күрһәтә белә, тип уйлайым. Башҡортостан Республикаһы Башлығы Радий ХӘБИРОВ: - Бөгөн махсус хәрби операция биләмәһендә Башҡортостан егеттәре күп. Уларҙы махсус хәрби операцияға оҙатҡан ваҡытта, һеҙ илебеҙҙе һаҡлағанда ғаиләләрегеҙ тураһында хәстәрлек күрербеҙ, тип әйткәйнем. Минең өсөн төп бурыс - уларҙы һәм ғаиләләрен ҡайғыртыу. Ғәлиә КӘРИМОВА, “Һуғыш балалары” йәмәғәт ойошмаһы бүлеге етәксеһе: - Республикала хәрби операцияла ҡатнашыусыларға һәм уларҙың ғаилә ағзаларына ярҙам сараларының ярайһы уҡ күп төрлө булыуы һәм башҡа төбәктәрҙәге сараларҙан сифаты яғынан айырылып тора. Башҡортостанда бөтәһе 40-тан ашыу ярҙам сараһы тормошҡа ашырылған. Аҡсалата түләүҙәрҙән тыш, яугирҙәр һөнәри һәм өҫтәмә белем алыу өсөн социаль сертификаттарға иҫәп тота ала.