“Торлаҡ һәм ҡала мөхите” милли проектының “Уңайлы ҡала мөхитен булдырыу” федераль проектын тормошҡа ашырыу сиктәрендә Башҡортостан Республикаһында йыл һайын йәмәғәт киңлектәре яңыртыла. Быйыл субъектта 123 территорияны төҙөкләндереү планлаштырылған. Яңыртыу һәм яңыларын төҙөү ҡалаларҙа ғына түгел, ауылдарҙа ла алып барыла. Милли проекттың иң мөһим критерийы - төҙөкләндереү өсөн биләмәләрҙе халыҡ үҙе һайлай. Мишкә районы “Уңайлы ҡала мөхитен булдырыу” федераль проектын тормошҡа ашырыуҙа әүҙем ҡатнаша. Әлеге ваҡытта район биләмәһендә Сурай ауылында мәҙәниәт һәм ял паркын төҙөкләндереү процесы бара. Төҙөүсеһе – “Агростройсервис” яуаплылығы сикләнгән йәмғиәте. Баҫҡысты яңыртыу, бордюрҙар ҡуйыу, тимерҙән яһалған элементтар менән ҡоймалар һәм ҡапҡалар урынлаштырыу, асфальттан юл һалыу, тышҡы яҡтыртыуҙы ойоштороу, биләмәне йәшелләндереү күҙаллана. Төҙөлөш быйыл 30 сентябрҙә тамамланырға тейеш. Күгәрсен районының Мораҡ ауылында “Уңайлы ҡала мөхитен булдырыу” федераль программаһы ярҙамында төҙөлгән “Шатлыҡ” паркын асыу тантанаһы үтте. Ауыл халҡы был ваҡиғаны көттө, хәҙер балаларҙың һәм өлкәндәрҙең тағы бер заманса ял, спорт һәм күңел асыу зонаһы барлыҡҡа килде. – Проект, ысынлап та, уңышлы эшләй, һәм беҙ һеҙҙең менән быны асыҡ күрәбеҙ. Был программа буйынса беҙҙең районда һигеҙ йәмәғәт киңлеге төҙөкләндерелгән дә инде. Ауыл халҡын төҙөкләндереү объектына һаҡсыл ҡарауҙарын һорайым, ул оҙаҡ йылдар ауылдаштарыбыҙҙы ҡыуандырһын, – ти Күгәрсен районы хакимиәте башлығы Марат Исҡужин. Хәтерегеҙгә төшөрәбеҙ, Башҡортостанда “Уңайлы ҡала мөхитен булдырыу” федераль проекты буйынса 2019 йылдан 683 объект төҙөкләндерелде. Билдәле булыуынса, “Торлаҡ һәм ҡала мөхите” (национальный проект “Жилье и городская среда”) милли проекты Рәсәй Президенты Владимир Путиндың май указы менән булдырылды. Фото: Торлаҡ-коммуналь хужалыҡ министрлығы.