Йорт алдарында, баҡса һәм парктарҙа көҙҙөң һуңғы йылы көндәренә тиклем күҙҙе йәмләп ултырған бәрхәт сәскәнең шәп кенә дауа булыуын күптәр белмәйҙер ҙә. Халыҡ медицинаһында был сәскә борондан билдәле булған. Ул һейҙек ҡыуыу, тирләтеү, эсәк селәүсендәренән арындырыу һәләтенә эйә. Эс китеү, артыҡ газ йыйылыу кеүек осраҡтарҙа ла килешә. Шулай уҡ бәрхәт сәскә организмдың киҙеү кеүек йоғошло сирҙәргә, һәр төрлө микробтарға, вирус һәм бактерияларға ҡаршы тороусанлығын арттыра, йәғни иммунитетты нығыта. Әммә уны бик һаҡ ҡулланырға, башта һеҙгә килешәме-юҡмы икәнен билдәләргә кәрәк, сөнки сәскә, айырыуса япраҡтары эфир майҙарына бай. Иң тәүҙә бер сынаяҡҡа бер бөртөк сәскәне һалып, өҫтөнә ҡайнаған һыу ҡойоғоҙ ҙа 15 минут төнәтегеҙ. Беренсе эскәндә үк был сәскәнең һеҙгә барамы-юҡмы икәнен аңларһығыҙ. Тымаулап танау тонғанда, гайморит ыҙалатҡанда 0,5 литрлы сәйнүккә 5 бөртөк сәскә һалырға һәм һемәгенә еткермәйенсә ҡайнаған һыу ҡойорға. Таҫтамал менән 5 минутҡа урап ултыртып тороғоҙ. Ошо ваҡыт үткәс, сәйнүк һемәгенән сыҡҡан йылы парҙы ауыҙ менән һуларға һәм танау менән сығарырға. Танауығыҙ яҡшы итеп асылып, тын ала башлаһа, киреһенсә танау менән һемәктән сыҡҡан йылы парҙы һулап, ауыҙ аша сығарығыҙ. Бәрхәт сәскәләрен йылы ваннаға һалып ятһағыҙ, был процедура һеҙҙе тынысландырыр, ауыр көсөргәнеш, депрессия осраҡтарында ярҙам итер. Сәләмәт булығыҙ! Мәҡәлә таныштырыу маҡсатында яҙылды. Халыҡ медицинаһы алымдарын ҡулланыр алдынан мотлаҡ табип менән кәңәшләшегеҙ.