Октябрьскийҙа яңыртылғандан һуң музыка колледжы асылды

Бөгөн, яңы уҡыу йылының беренсе көнөндә, Башҡортостан Башлығы Радий Хәбиров Октябрьский ҡалаһына эш сәфәре менән барҙы. Уның барышында капиталь ремонттан һуң эшләй башлаған музыка колледжында ла булды. Уҡыу йорто 1953 йылда төҙөлгән бинала урынлашҡан, ул мәҙәни ҡомартҡылар иҫәбенә инә. Ныҡ таушалған бина “Мәҙәниәт” милли проектына (нацинальный проект “Культура”) ярашлы йүнәтелгән. Башҡортостан етәксеһе Белем көнө уңайынан ойошторолған тантаналы линейкала булды һәм яңыртылған уҡыу кабинеттарын ҡарап сыҡты. Колледждың директоры Илдар Хажиев уҡыу йортоноң быйыл 55 йыллығын билдәләүе тураһында һөйләне. Ошо ваҡыт эсендә бында ике меңләп йәш белгес һөнәр алып сыҡҡан, уларҙың байтағы сәнғәт оҫталары, конкурстар лауреаты һәм атҡаҙанған мәҙәниәт эшмәкәрҙәре дәрәжәһенә ирешкән. – Беҙҙең колледж яҡын-тирәләге 10 райондың музыка мәктәптәре өсөн методик үҙәк булып тора, – тине И. Хажиев. – Әле 170 студент белем ала, ситтән килгәндәргә 100 урынлыҡ дөйөм ятаҡ бар. Коллективта 77 уҡытыусы эшләй. Байрам концерты ваҡытында Радий Хәбиров йәштәрҙе ҡотланы һәм уҡытыусыларға дәүләт наградалары тапшырҙы. – Октябрьскийға килһәм, күңелдә рәхәт тойғолар ҡала. Ҡала эре сәнәғәт үҙәге булып тора, бында уңыштарға өлгәшкән тырыш кешеләр эшләй. Спорт инфраструктураһы ла үҫешкән. Бөгөн бассейнды төҙөү буйынса фекер алыштыҡ, бындағы Боҙ һарайында йөҙәрләгән малайҙың хоккей менән шөғөлләнгәнен күрҙек. Артабанғы пландарҙы ла билдәләнек: республика ҡалаға ярҙам итте һәм итәсәк, гүзәл Башҡортостаныбыҙҙы артабан да бергәләп үҫтерербеҙ! – тине ул. * * * Журналистар менән әңгәмәлә Радий Хәбиров, йәш таланттарға республикала уңайлы шарттар тыуҙырыла, тип билдәләне. – Октябрьскийҙың музыка колледжы капиталь ремонттан һуң танымаҫлыҡ үҙгәргән. Ремонт оҙаҡ ҡына барҙы, сөнки был мәҙәни мираҫ объекты, ул ҡот осҡос хәлгә еткәйне. Яңыртыуға 275 миллион һум аҡса китте. Төҙөүселәр эште яҡшы башҡарған. Уҡыу йортонда республиканың музыка элитаһы формалаша. Күп кенә белгестәр аҙаҡтан район һәм ҡала мәҙәниәт һарайҙарында эшләй, ҡайһылары Өфө дәүләт сәнғәт институтына уҡырға килә. Ошонда талантлы егет-ҡыҙҙарыбыҙ башланғыс ала, – тине республика етәксеһе. – Шуныһы мөһим: колледждарыбыҙҙың уҡыу корпустарын, оҫтаханаларын һәм ятаҡтарын тәртипкә килтергәс тә, уларҙа конкурс артып китә. Мәғлүмәт сығанағы, фото: Башҡортостан Башлығы сайты glavarb.ru