1 сентябрь – Белем көнө уңайынан, илебеҙҙең, шул иҫәптән, республикабыҙҙың бөтә белем усаҡтарында ла тантаналы линейка үтте. Әйткәндәй, Башҡортостан буйынса быйыл I класҡа 48 мең тирәһе ҡыҙ һәм малай килде. Фатима Мостафина исемендәге 20-се Өфө ҡала башҡорт гимназияһында ла, яңы уҡыу йылын башланыуын белдереп, тәүге ҡыңғырау яңғыраны. Был күңелле бурысты XI класс уҡыусыһы Асҡар Йәғәфәров менән I класс уҡыусыһы Йәсмин Лоҡманова үтәне. Әлбиттә, башта Рәсәй һәм Башҡортостан гимндары яңғыраны, ә илебеҙҙең һәм республикабыҙҙың флагтарын күтәреү инглиз теле уҡытыусыһы Диана Зәкирова һәм XI класс уҡысыһы Баязит Кәримовҡа тапшырылды. – Яңы уҡыу йылы барығыҙға ла тик сағыу ваҡиғалар, бөтмәҫ уңыштар, лайыҡлы еңеүҙәр, яҡшы яңылыҡтар һәм матур хәбәрҙәр генә килтерһен, иң мөһиме, донъялар тыныс булһын, – тине Фатима Мостафина исемендәге 20-се Өфө ҡала башҡорт гимназияһының директор вазифаһын башҡарыусы Рөстәм Аҙнабаев. Рөстәм Илһам улы уҡыу йорто менән тығыҙ бәйләнеш тотҡан "Гүзәл-данс" бейеү ансамбле етәксеһе Гүзәл Исламғоловаға Фатима Мостафина исемендәге премияны тапшырҙы. Дәүләт Йыйылышы – Ҡоролтай депутаты, Бөтә донъя башҡорттары ҡоролтайы Башҡарма комитеты рәйесе Юлдаш Йосопов әйтеүенсә, 20-се башҡорт гимназияһы һәр йәһәттән дә алдынғы, бүтән белем усаҡтарына маяҡ. Гимназист исемен йөрөтөү – ҙур бәхет тә, оло ғорурлыҡ та. Рәсәйҙең, шул иҫәптән, Башҡортостандың киләсәге ошо егет һәм ҡыҙҙарҙың ҡулына күсә тиеү ысынбарлыҡҡа тура килә. 2024/25 уҡыу йылында гимназияла 800 тирәһе уҡыусы уҡый башланы, беренсе тапҡыр белем биреү учреждениеһының ишеген йөҙгә яҡын бала асып ингән, ҡыҫҡаһы, өс беренсе класс тупланған. I В класы уҡытыусыһы Айгөл Кәлиева белдереүенсә, ул малай һәм ҡыҙҙарҙы ҙур теләк менән ҡабул итеп алған, зирәклектә һәм отҡорлоҡта уларға етеүсе юҡ. Ғөмүмән, йылдан-йыл балаларҙың мәктәпкә тулы әҙерлек менән килеүенә ҡыуанысын йәшермәй. – Айбулат улым – II В класы уҡыусыһы, – тип шатлығы менән уртаҡлаша Әмир Солтангәрәев. – Ул йәйге оҙайлы каникулда баш ҡалабыҙҙың иҫтәлекле урындарын күреүҙән тыш, ауылда ла булырға өлгөрҙө, ял итеү һәм һауыҡтырыу лагерына ла барҙы, бер һүҙ менән әйткәндә, яңы уҡыу йылына етерлек көс тупланы. Яҡшы уҡыуы һәм төрлө сараларҙа әүҙем ҡатнашыуы менән тиҫтерҙәре араһында абруй ҙур ғына. Бәләкәй, әммә шиғыр яҙа, импровизаторлыҡ һәләте лә бар.